महा पोलीस न्यूज । १६ मे २०२५ । जळगाव शहरात गांजा विक्री आणि सेवन करणाऱ्याविरुद्ध पोलीस अधीक्षक डॉ.महेश्वर रेड्डी यांनी मोहीम हाती घेतली आहे. गुरुवारी एकाच दिवसात शहरात १३ कारवाई करण्यात आल्या. ही कारवाई अशीच सुरू राहिल्यास गांजा विक्री आणि सेवनला आळा बसणार आहे.
जळगाव शहर पोलीस उपविभागाच्या हद्दीत उपविभागीय पोलीस अधिकारी संदीप गावीत आणि परिरक्षावधीन पोलीस उपअधीक्षक केदार बारबोले यांच्या मार्गदर्शनाखाली गांजा सेवन करणाऱ्या १३ जणांवर कठोर कारवाई करण्यात आली. ही कारवाई शहरातील विविध पोलीस ठाण्यांच्या हद्दीत करण्यात आली असून, यामध्ये जळगाव शहर (२ प्रकरणे), शनीपेठ (५ प्रकरणे), एमआयडीसी (२ प्रकरणे), जिल्हापेठ (२ प्रकरणे) आणि रामानंदनगर (२ प्रकरणे) यांचा समावेश आहे.
पोलिसांनी गांजा सेवन आणि बेकायदेशीर कृत्यांना आळा घालण्यासाठी ही मोहीम तीव्र केली असून, यापुढेही अशा कारवाया सुरू राहणार असल्याचे उपविभागीय पोलीस अधिकारी संदीप गावीत यांनी सांगितले. नागरिकांनी कायदा व सुव्यवस्थेचे पालन करावे, असे आवाहनही पोलिसांनी केले आहे.
