महा पोलीस न्यूज । चेतन वाणी । जळगाव जिल्ह्यातील एम.आय.डी.सी. पोलीस ठाण्याच्या रेकॉर्डवरील सराईत आणि कुख्यात गुन्हेगार समीर हनीफ काकर (वय- २२, रा.बिस्मील्ला चौक, तांबापुरा, जळगाव) याला महाराष्ट्र प्रतिबंधक स्थानबद्धता कायदा (MPDA – Maharashtra Prevention of Dangerous Activities Act) अंतर्गत अटक करून येरवडा मध्यवर्ती कारागृह, पुणे येथे स्थानबद्ध करण्यात आले आहे.
पोलिसांनी दिलेल्या माहितीनुसार, समीर काकर याच्यावर खुनाचा प्रयत्न करणे, दरोडा, जबर दुखापत करणे, घरफोडी अशा शरीराविरुद्धचे आणि मालाविरुद्धचे एकूण १३ गंभीर गुन्हे दाखल होते. तांबापुरा, मेहरुण, आणि जळगाव परिसरात त्याची मोठी दहशत होती. सामान्य नागरिकांना विनाकारण मारहाण करणे, शिवीगाळ करणे आणि गुन्हेगारी कृत्ये करणे यामुळे परिसरातील शांतता भंग पावली होती. यापूर्वी त्याला १ वर्षासाठी जिल्हा हद्दपार करण्यात आले होते, परंतु हद्दपारीनंतरही त्याने आपले गुन्हेगारी कृत्य सुरूच ठेवले.
एम.आय.डी.सी. पोलीस ठाण्याकडून प्रस्ताव
समीरच्या गुन्हेगारी कारवायांवर कायमस्वरूपी आळा घालण्यासाठी एम.आय.डी.सी. पोलीस ठाण्याकडून त्याच्याविरुद्ध एम.पी.डी.ए. कायद्याखाली स्थानबद्धतेचा प्रस्ताव पोलीस अधीक्षक महेश्वर रेड्डी यांच्याकडे पाठवण्यात आला होता. पोलीस अधीक्षकांनी हा प्रस्ताव जिल्हाधिकारी आयुष प्रसाद यांच्याकडे सादर केला. जिल्हाधिकाऱ्यांनी दिनांक ४ रोजी समीर काकर यास येरवडा, पुणे येथे स्थानबद्ध करण्याचे आदेश पारित केले.
पुण्यातून केली अटक
जिल्हाधिकाऱ्यांचा आदेश प्राप्त झाल्यापासून समीर काकर हा फरार होता. अखेर दिनांक २४ रोजी पोलीस निरीक्षक बबन आव्हाड यांना गोपनीय माहिती मिळाली की, हा स्थानबद्ध गुन्हेगार पुणे येथे लपून बसला आहे. त्यानुसार पोलीस निरीक्षक बबन आव्हाड यांच्या मार्गदर्शनाखाली एम.आय.डी.सी. पो.स्टे. च्या गुन्हे शोध पथकातील पोलीस उपनिरीक्षक चंद्रकांत धनके, पो.ना. प्रदीप चौधरी, पो.काँ. विशाल कोळी आणि गणेश ठाकरे यांचे पथक तातडीने पुणे येथे रवाना करण्यात आले. या पथकाने २५ रोजी आरोपी समीर काकर याला पुणे येथे शिताफीने ताब्यात घेतले आणि त्याला मध्यवर्ती कारागृह, येरवडा, पुणे येथे स्थानबद्ध करण्यात आले आहे.
पथकात यांचा होता समावेश
यशस्वी कारवाई पोलीस अधीक्षक डॉ.महेश्वर रेड्डी, अपर पोलीस अधीक्षक अशोक नखाते, आणि उपविभागीय पोलीस अधिकारी नितीन गणापुरे यांच्या मार्गदर्शनाखाली पोलीस निरीक्षक बबन आव्हाड, पोलीस उपनिरीक्षक चंद्रकांत धनके, पो.ना. प्रदीप चौधरी, पो. काँ विशाल कोळी, गणेश ठाकरे, आणि योगेश घुगे यांनी पार पाडली.
