महा पोलीस न्यूज । चेतन वाणी । उपमुख्यमंत्री एकनाथ शिंदे यांचा स्वीय सहायक असल्याचे सांगत बनावट ओळखपत्र, लेटर पॅड व अपॉइंटमेंट लेटर दाखवून १८ जणांची तब्बल ५५ लाख ६० हजार रुपयांची फसवणूक केल्याचा धक्कादायक प्रकार उघडकीस आला आहे. रेल्वेमध्ये नोकरी, म्हाडामध्ये फ्लॅट तसेच विविध लाभांचे आमिष दाखवत हे दाम्पत्य नोव्हेंबर २०२४ ते ७ ऑगस्ट २०२५ दरम्यान फसवणुकीचा डाव रचत होते.
मूळचे पाचोरा येथील हितेश रमेश संघवी (४९) व पत्नी अर्पिता संघवी (४५, दोघे रा. ह.मु., नवी मुंबई) या दाम्पत्याविरुद्ध शनिपेठ पोलिस ठाण्यात गुन्हा दाखल झाला असून, तपास आर्थिक गुन्हे शाखेकडे वर्ग करण्यात आला आहे.
आरोपानुसार, संशयितांनी हर्षल शालिग्राम बारी (३२, रा. विठ्ठल पेठ) यांच्याकडून १३ लाख ३८ हजार रुपये व इतर १७ जणांकडून ४२ लाख २२ हजार रुपये घेतले. बारी हे दूध डेअरी व्यवसायिक असून, कार्लिका माता मंदिर परिसरातील त्यांच्या डेअरीमध्येच हा सर्व प्रकार घडला. अनेक महिने उलटूनही ना नोकरी मिळाली, ना वचन दिलेले काम झाले. फसवणूक झाल्याचे लक्षात येताच हर्षल बारी यांनी शनिपेठ पोलिसांकडे तक्रार दाखल केली.
