महा पोलीस न्यूज । चेतन वाणी । पाचोरा तालुक्यातील एका गावात राहणाऱ्या दहावीतील विद्यार्थिनीवर स्कूल बसचालकानेच शेतात नेऊन अत्याचार केल्याची धक्कादायक घटना गेल्या महिन्यात घडली. याप्रकरणी पीडित विद्यार्थिनीच्या वडिलांनी दिलेल्या फिर्यादीनुसार त्याच्याविरुध्द १९ ऑगस्ट रोजी पोलिसात बलात्कारासह पोस्कोंतर्गत गुन्हा दाखल करण्यात आला आहे. अबिद हुसेन शेख जलील (३८, रा.शेंदुर्णी, ता.जामनेर) असे अटक केलेल्या बसचालकाचे नाव असून त्याला पाचोरा न्यायालयाने पाच दिवसांची पोलिस कोठडी सुनावली आहे.
पीडितेच्या वडिलांनी पोलिसांत दिलेल्या फिर्यादीनुसार पाचोरा तालुक्यातील एका गावातील काही विद्यार्थी शिक्षणासाठी शेंदुर्णी (ता. जामनेर) येथे स्कूल बसने ये-जा करतात. गेल्या महिन्यात स्कूल बसचालक अबिद हुसेन शेख जलील (३८, रा.शेंदुर्णी, ता.जामनेर) हा दुचाकीने संबंधित मुलीच्या गावात आला होता. तेव्हा ही मुलगी बाहेर जात असताना संशयिताने ‘तू मला आवडतेस’ म्हणून पाठलाग करीत तिचा विनयभंग केला.
शेतात घेऊन जात केला अत्याचार
घडलेला प्रकार पीडितेने घरी सांगितल्यानंतर याप्रकरणी पीडितेच्या वडिलांनी पोलिसात फिर्याद दिली होती. पीडित मुलीने गुरुवारी पुरवणी जबाब दिला. त्यात म्हटले आहे की, बसचालकाने माळेगाव (ता.जामनेर) येथील शेतात नेऊन तिच्यावर अत्याचार केला. तसेच या मुलीला फोनवरून वारंवार धमकावत व अश्लील बोलत छळ केला.
पोलीस तपास सुरू, बसने ५०-६० विद्यार्थ्यांचा प्रवास
संबंधित गावातून दररोज ५० ते ६० विद्यार्थी – विद्यार्थिनी शेंदुर्णी (ता. जामनेर) येथे स्कूल बसने ये-जा करतात. बसचालकाने या आधी देखील कुणाची छेड काढली आहे का? याबाबतही पोलिस तपास करीत आहेत. आरोपीवर पोस्को कायद्यांतर्गत गुन्हा दाखल करण्यात आला आहे. त्याला अटक झाली असली, तरी हे पुरेसे नाही. भविष्यात अशा घटना पुन्हा घडू नयेत यासाठी कठोर नियम आणि त्यांची प्रभावी अंमलबजावणी करणे आवश्यक आहे. बस चालकांची नेमणूक करताना त्यांच्या चारित्र्याची कसून तपासणी केली पाहिजे.
स्कूल बस सुरक्षीत आहे का?
पालकांनी आपल्या मुलांना सुरक्षिततेच्या दृष्टीने खासगी स्कूल बसमध्ये पाठवायचे का, यावर आता चर्चा सुरू झाली आहे. शिक्षण व्यवस्था आणि खासगी बस चालकांची नेमणूक करणाऱ्या संस्था याकडे गांभीर्याने लक्ष का देत नाहीत? विद्यार्थ्यांच्या सुरक्षिततेची जबाबदारी केवळ पालकांचीच नाही, तर शिक्षण व्यवस्था, शाळा प्रशासन आणि या बस सेवा पुरवणाऱ्या कंपन्यांची देखील आहे.
पहा संपूर्ण व्हिडिओ :
