नशिराबादच्या राजकारणात चर्चेला उधाण! अपक्ष नगरसेवक ॲड. इक्बाल शेख आणि शिवसेनेचे प्रदीप साळी यांची गुलाबराव देवकरांशी सदिच्छा भेट

प्रदीप साळी यांचा सामाजिक व राजकीय प्रवास चर्चेत; इक्बाल शेख यांनाही युवकांचा मोठा पाठिंबा

नशिराबाद, प्रतिनिधी : नशिराबाद येथील अपक्ष नगरसेवक ॲड. इक्बाल शेख आणि शिवसेनेचे माजी ग्रामपंचायत सदस्य तथा सामाजिक कार्यकर्ते प्रदीप अनिल साळी यांनी माजी पालकमंत्री व राष्ट्रवादी काँग्रेसचे ज्येष्ठ नेते गुलाबराव देवकर यांची सदिच्छा भेट घेतली. या भेटीमुळे नशिराबादच्या राजकीय वर्तुळात चर्चेला सुरुवात झाली आहे. स्थानिक विकास, सामाजिक कार्य आणि राजकीय घडामोडींच्या पार्श्वभूमीवर या भेटीकडे लक्ष वेधले जात आहे.

प्रदीप साळी हे अनेक वर्षांपासून शिवसेनेत सक्रिय असून, त्यांनी राजकीय आणि सामाजिक क्षेत्रात विविध जबाबदाऱ्या सांभाळल्या आहेत. २०१४ ते २०१९ या कालावधीत नशिराबाद ग्रामपंचायतीत ते शिवसेनेचे एकमेव सदस्य होते. तसेच त्यांनी जळगाव जिल्हा कामगार सेनेचे अध्यक्षपद, झिपरू अण्णा महाराज फाउंडेशनचे अध्यक्षपद आणि नशिराबाद साळी समाजाचे अध्यक्षपद भूषविले आहे.

सामाजिक कार्यातून स्वतंत्र ओळख

प्रदीप साळी यांनी युवकांचे प्रश्न, कामगारांना रोजगार मिळवून देणे, रुग्णालयांशी संबंधित कामे, ज्येष्ठ नागरिकांच्या पेन्शन योजना तसेच सर्वसामान्य नागरिकांच्या अडचणी सोडविण्यासाठी विविध उपक्रमांत सहभाग घेतला आहे. सामाजिक कार्याच्या माध्यमातून नागरिकांशी सातत्याने संपर्क ठेवत त्यांनी स्थानिक पातळीवर आपली स्वतंत्र ओळख निर्माण केली आहे.

ॲड. इक्बाल शेख यांनाही युवकांचा मोठा पाठिंबा

दुसरीकडे, अपक्ष म्हणून निवडणूक लढवून मोठ्या मताधिक्याने विजय मिळविणारे नगरसेवक ॲड. इक्बाल शेख यांचाही नशिराबादमध्ये युवकांमध्ये मोठा जनसंपर्क असल्याचे सांगितले जाते. स्थानिक प्रश्न आणि नागरिकांच्या अपेक्षांच्या अनुषंगाने त्यांची भूमिका महत्त्वाची मानली जात आहे.

या पार्श्वभूमीवर ॲड. इक्बाल शेख आणि प्रदीप साळी यांनी गुलाबराव देवकर यांची घेतलेली सदिच्छा भेट चर्चेचा विषय ठरली आहे. मात्र, या भेटीतून कोणताही विशिष्ट राजकीय निर्णय किंवा आगामी राजकीय भूमिका जाहीर झालेली नसल्याने या भेटीचा राजकीय अर्थ लावण्याबाबत अधिकृत माहिती समोर आलेली नाही.

भेटीवेळी कार्यकर्त्यांची उपस्थिती

या वेळी शहराध्यक्ष गणेश भाऊ चव्हाण, नगरसेवक ॲड. इक्बाल शेख, प्रदीप साळी, विशाल झोपे, अरुण भोई, अनिल धनगर, फिरोज पिंजारी, आकाश निकम, हितेश राजपूत, सुरेश नाथ, पिंटू माळी, हितेश धनगर, गौरव नाथ, पंकज नाथ, प्रदीप बिल्हाडे, शैलेंद्र सपकाळे, विनायक भोई, रोहन वानखेडे, राजू मोची, अतफाब शेख, विशाल दिघे, सोनू खान, मनोज भाई, विकास भोई, योगेश साळी, काशिनाथ झोपे, रवि झोपे, संजय रंगमले, किरण बिन्हाडे, राहुल कुंभार, आसिफ भाई, शाकीर खान आदी उपस्थित होते.

या सदिच्छा भेटीमुळे नशिराबादमधील राजकीय आणि सामाजिक वर्तुळात नव्याने चर्चा सुरू झाली असून, आगामी काळात स्थानिक विकासाच्या मुद्द्यांवर विविध नेते आणि कार्यकर्त्यांमध्ये कोणत्या स्वरूपाचा संवाद घडतो, याकडे नागरिकांचे लक्ष लागले आहे.