महाराष्ट्र राज्य शिष्यवृत्ती परीक्षेत सख्ख्या बहिणी गुणवत्ता यादीत
भडगाव (प्रतिनिधी)
शालेय वयातील बुद्धिमान विद्यार्थ्यांच्या बौद्धिक क्षमतेला वाव मिळावा तसेच राज्यातील गुणवंत विद्यार्थ्यांची निवड करण्याच्या उद्देशाने शालेय शिक्षण विभागामार्फत इयत्ता पाचवी व आठवीसाठी शिष्यवृत्ती परीक्षा घेतली जाते. या परीक्षेत गुणवत्ता यादीत स्थान मिळविणाऱ्याविद्यार्थ्यांना दरवर्षी १२ हजार रुपये प्रोत्साहनपर शिष्यवृत्ती दिली जाते. यावर्षीच्या शिष्यवृत्ती परीक्षेत भडगाव तालुक्यातील जुने वडधे येथील हॉटेल व्यावसायिक लहूसिंग शिवसिंग पाटील यांच्या कन्या कु. आरुषी लहूसिंग पाटील (इयत्ता पाचवी) व कु.प्रांजल लहूसिंग पाटील (इयत्ता आठवी) या दोन्ही सख्ख्या बहिणींनी गुणवत्ता यादीत स्थान मिळवून उल्लेखनीय यश संपादन केले आहे. सदर विद्यार्थिनी या महात्मा फुले शिक्षण प्रसारक मंडळ संचलित आदर्श कन्या विद्यालय व कनिष्ठ महाविद्यालयाच्या विद्यार्थिनी
आहेत. त्यांच्या या यशाबद्दल संस्थेचे अध्यक्ष, मानद सचिव, विद्यालयाचे मुख्याध्यापक, पर्यवेक्षक, सर्व शिक्षक व शिक्षकेतर कर्मचाऱ्यांनी त्यांचे अभिनंदन केले. तसेच भडगाव व पंचक्रोशीतील विविध मान्यवरांनीही विद्यार्थिनींचे कौतुक करून शुभेच्छा दिल्या. या यशासाठी विद्यार्थिनींना गणेश नारायण पडसरे व परीक्षा समन्वयक आर. आर. जाधव यांचे मार्गदर्शन लाभले.
