जिल्ह्यात राज्य उत्पादन शुल्क विभागाची धडक मोहीम
चार दिवसांत २० गुन्हे दाखल; १५ आरोपी ताब्यात, साडेपाच लाखांचा मुद्देमाल जप्त
अमळनेर| प्रतिनिधी
पुणे येथे गावठी दारूमुळे घडलेल्या दुर्घटनेच्या पार्श्वभूमीवर राज्य उत्पादन शुल्क विभागाने जळगाव जिल्ह्यातील चोपडा , अमळनेर ,धरणगाव, पारोळा या ततालुक्यांमध्ये विशेष धडक मोहीम राबवून अवैध मद्यनिर्मिती व विक्रीविरोधात मोठी कारवाई केली आहे. दि. १ जून ते ४ जून २०२६ या कालावधीत राबविण्यात आलेल्या मोहिमेत एकूण २० गुन्हे नोंदविण्यात आले असून १५ आरोपींना ताब्यात घेण्यात आले आहे.
राज्य उत्पादन शुल्क विभागाचे अधीक्षक व्ही. टी. भुकन यांच्या मार्गदर्शनाखाली ही मोहीम राबविण्यात आली. कारवाईदरम्यान आरोपींकडून तब्बल ७,४१० लिटर रसायन, २०० लिटर गावठी दारू, २०० लिटर ताडी तसेच एक मोटारसायकल जप्त करण्यात आली. जप्त करण्यात आलेल्या मुद्देमालाची एकूण किंमत ५ लाख ६० हजार ७९५ रुपये इतकी असल्याची माहिती विभागाकडून देण्यात आली.
ही कारवाई चोपडा विभागातील चिखलोत शिवार, शेळावे शिवार, गांधली, कलाली, सावखेडा, हिंगोली बुद्रुक, सुटकार आणि अडावद परिसरात करण्यात आली. अवैध मद्यनिर्मिती, वाहतूक आणि विक्री रोखण्यासाठी विभागाकडून सातत्याने विशेष मोहिमा राबविण्यात येत असल्याचे अधिकाऱ्यांनी सांगितले.
या मोहिमेत निरीक्षक अ. कै. सु. मोमीन, दुय्यम निरीक्षक जी. एस. मोरे, एन. पी. खपके, आर. के. फुसे तसेच कर्मचारी डी. एन. पाटील, एस. एस. पाटील, भूषण परदेशी आणि नितीन पाटील यांनी सहभाग घेत कारवाई यशस्वी केली.
दरम्यान, राज्य उत्पादन शुल्क विभागाने नागरिकांना आवाहन केले आहे की, अवैध मद्यनिर्मिती, हातभट्टी, वाहतूक किंवा विक्रीबाबत कोणतीही माहिती अथवा तक्रार असल्यास टोल फ्री क्रमांक १८००-२३३-९९९९ किंवा व्हॉट्सॲप क्रमांक ८४२२००११३३ वर संपर्क साधावा. नागरिकांच्या सहकार्यामुळे अशा अवैध धंद्यांवर अधिक प्रभावीपणे कारवाई करणे शक्य होणार असल्याचे विभागाने स्पष्ट केले आहे.
