महा पोलीस न्यूज । चेतन वाणी । धुळे शहरातील अवैध धंदे, सट्टा-जुगार, क्लब आणि बेकायदेशीर सावकारीविरोधात पोलीस प्रशासनाने आता कठोर भूमिका घेतली आहे. कायदा-सुव्यवस्थेला आव्हान देणाऱ्या आणि सर्वसामान्य नागरिकांची आर्थिक पिळवणूक करणाऱ्यांनी तातडीने आपले अवैध उद्योग बंद करावेत, अन्यथा कायद्याच्या कठोर कारवाईला सामोरे जावे, असा स्पष्ट आणि ठाम इशारा धुळे जिल्ह्याचे पोलीस अधीक्षक विशाल आनंद सिंगुरी यांनी दिला आहे.
१३ ऑक्टोबर रोजी सायंकाळी सहा वाजण्याच्या सुमारास पोलीस अधीक्षक कार्यालयात अवैध व्यवसाय करणाऱ्या आरोपींना बोलावून त्यांना अवैध धंदे तातडीने बंद करण्याची सक्त सूचना देण्यात आली. यावेळी अपर पोलीस अधीक्षक अजय देवरे उपस्थित होते. पोलिसांच्या नजरेआड राहून अवैध व्यवसाय सुरू ठेवण्याचा प्रयत्न करणाऱ्यांनाही सोडले जाणार नाही, असा स्पष्ट संदेश या कारवाईतून देण्यात आला आहे.
अवैध धंदे सुरू ठेवल्यास थेट छापा आणि कठोर कारवाई
सट्टा-जुगार, क्लब, मटका यांसारखे अवैध व्यवसाय चालविणाऱ्यांनी पोलिसांच्या सूचनेकडे दुर्लक्ष केल्यास त्यांच्यावर छापे टाकून प्रचलित कायद्यानुसार कठोर कारवाई करण्यात येईल, असे पोलीस प्रशासनाने स्पष्ट केले आहे. कोणत्याही प्रकारचा अवैध व्यवसाय सहन केला जाणार नाही, ही भूमिका पोलीस अधीक्षकांनी ठामपणे मांडली आहे. या इशाऱ्यामुळे अवैध धंदे चालविणाऱ्यांचे धाबे दणाणण्याची शक्यता आहे. केवळ सूचना देऊन थांबण्याऐवजी नियमांचे उल्लंघन करणाऱ्यांविरुद्ध कायदेशीर कारवाईचा मार्ग खुला ठेवण्यात आला आहे.
नागरिकांना दिलासा देण्याचा प्रयत्न
सर्वसामान्य नागरिकांची पिळवणूक करणाऱ्या अवैध सावकारांविरोधातही पोलीस प्रशासनाने कठोर भूमिका घेतली आहे. सावकारांनी शेतकरी, शेतमजूर आणि अन्य गरजू नागरिकांकडून अवाजवी व्याज आकारू नये. व्याजाच्या नावाखाली तगादा लावून नागरिकांना त्रास देण्याचे प्रकार आढळल्यास संबंधितांनी पोलिसांशी संपर्क साधावा, असे आवाहन करण्यात आले आहे. अवैध सावकारीमुळे आर्थिक अडचणीत सापडलेल्या नागरिकांना संरक्षण मिळावे आणि त्यांच्या तक्रारींवर कायद्यानुसार कारवाई व्हावी, या दृष्टीने पोलिसांनी नागरिकांना पुढे येण्याचे आवाहन केले आहे.
५० ते ६० संशयित आरोपींवर कारवाई
धुळे शहरातील कायदा व सुव्यवस्था अबाधित राखण्यासाठी पोलीस अधीक्षक विशाल आनंद सिंगुरी यांनी कठोर पावले उचलली आहे. यापूर्वी अवैध व्यवसायांशी संबंधित सुमारे ५० ते ६० आरोपींवर, तसेच अवैध सावकारी, बिंगो, गरूड, सुर्वे आणि थोरात यांच्याशी संबंधित व्यक्तींवर कारवाई करण्यात आल्याची माहितीही देण्यात आली आहे. अवैध धंद्यांविरोधातील या भूमिकेमुळे कायद्याचे उल्लंघन करणाऱ्यांना स्पष्ट इशारा मिळाला असून, शहरातील शांतता आणि सुरक्षितता टिकवून ठेवण्यासाठी पोलीस प्रशासनाने कारवाईची भूमिका अधिक ठाम केली आहे.
नागरिकांनो, अवैध धंद्यांची माहिती थेट पोलिसांना द्या!
धुळे जिल्हा पोलीस प्रशासनाने नागरिकांनाही या मोहिमेत सहभागी होण्याचे आवाहन केले आहे. परिसरात सट्टा-जुगार, इतर अवैध धंदे किंवा अवैध सावकारी सुरू असल्याचे निदर्शनास आल्यास नागरिकांनी जवळच्या पोलीस ठाण्यात अथवा पोलीस निरीक्षक ज्ञानेश्वर वारे, स्थानिक गुन्हे शाखा, धुळे यांच्याशी संपर्क साधावा, असे आवाहन करण्यात आले आहे.
अवैध धंदेवाल्यांसाठी संदेश स्पष्ट म्हणजेच कायद्याच्या चौकटीबाहेर जाऊन व्यवसाय करण्याची मुभा मिळणार नाही. तर नागरिकांसाठी दिलासा देणारी बाब म्हणजे, तक्रारींसाठी पोलीस प्रशासनाने थेट संपर्क साधण्याचे आवाहन केले आहे. आता या सक्त ताकीदीनंतर अवैध धंद्यांविरोधात प्रत्यक्षात किती प्रभावी कारवाई होते, याकडे धुळेकरांचे लक्ष लागले आहे.
