छडा : माजी मंत्री एकनाथराव खडसेंच्या बंगल्यातील चोरीप्रकरणी तिघे जेरबंद ! ; ६ लाख २१ हजारांचा मुद्देमाल हस्तगत
छडा : माजी मंत्री एकनाथराव खडसेंच्या बंगल्यातील चोरीप्रकरणी तिघे जेरबंद ! ; ६ लाख २१ हजारांचा मुद्देमाल हस्तगत
मुख्य संशयित फरार ; रामानंद नगर आणि एलसीबीची संयुक्त कारवाई
जळगाव प्रतिनिधी माजी मंत्री आणि आमदार एकनाथराव खडसे यांच्या शिवराम नगर येथील बंगल्यात झालेल्या घरफोडी प्रकरणाचा छडा रामानंद नगर पोलिसांनी लावला असून, तीन आरोपींना अटक करून त्यांच्याकडून ६ लाख २१ हजार रुपयांचा सोन्या-चांदीचा मुद्देमाल हस्तगत करण्यात आला आहे. मात्र, या प्रकरणातील मुख्य आरोपी अद्याप फरार असून त्यांचा शोध सुरू आहे.
सूत्रांनी दिलेल्या माहितीनुसार, २७ ऑक्टोबरच्या रात्रीपासून २८ ऑक्टोबरच्या सकाळपर्यंत मुक्ताई बंगला बंद असताना अज्ञात चोरट्यांनी कुलूप तोडून आत प्रवेश केला. त्यांनी सोन्या-चांदीचे दागिने आणि रोख रक्कम असा सुमारे ६ लाख ७० हजार रुपयांचा ऐवज लंपास केला. या घटनेनंतर चेतन सुरेश देशमुख यांनी रामानंद नगर पोलिस ठाण्यात फिर्याद दिली होती.
या प्रकरणाचा तपास पोलिस अधीक्षक डॉ. महेश्वर रेड्डी, अपर पोलिस अधीक्षक अशोक नखाते व उपविभागीय अधिकारी नितीन गणापुरे यांच्या मार्गदर्शनाखाली पोलिस निरीक्षक राजेंद्र गुंजाळ आणि स्थानिक गुन्हे शाखेचे निरीक्षक राहुल गायकवाड यांच्या नेतृत्वाखाली सुरू करण्यात आला.
तपासादरम्यान गोपनीय माहितीच्या आधारे पोलिसांना गुन्ह्यात वापरलेली सुजुकी बर्गमन दुचाकी (MH-19-ER-5539) मिळाली. वाहनाच्या मालकाची चौकशी केल्यानंतर त्याच्या नातेवाईकांनीच चोरी केल्याचे समोर आले.
या तपासाच्या धाग्यांवरून पोलिसांनी जियाउद्दीन हुस्नोददीन शेख (३९, रा. मास्टर कॉलनी, जळगाव) याला अटक केली. पुढील चौकशीत त्याने चोरीचा माल उल्हासनगर येथील सोनाराकडे विकल्याची कबुली दिली. त्यानंतर पोलिसांनी मुंबईत धाड टाकून चिराग इकबाल सैय्यद (२२, रा. उल्हासनगर) व कैलास हिराचंद खंडेलवार (४८, रा. कल्याण) या दोघांना अटक केली. त्यांच्या ताब्यातून तब्बल ६ लाख २१ हजार रुपयांचा सोन्या-चांदीचा मुद्देमाल जप्त करण्यात आला.
या हस्तगत मुद्देमालात ३१.९७० ग्रॅम वजनाचे सोन्याचे दागिने, लगड, चैन, अंगठ्या, कानातील रिंग तसेच २१७ ग्रॅम वजनाची चांदीची गणपती मूर्ती यांचा समावेश आहे. तर या प्रकरणातील मुख्य आरोपी — मोहम्मद बिलाल उर्फ बिल्ला अब्दुल करीम चौधरी, एजाज अहमद उर्फ सलीम अब्दुल चौधरी व ‘बाबा’ (पूर्ण नाव माहीत नाही) हे उल्हासनगर-मुंबई परिसरातील असून, सध्या फरार आहेत. या तिघांविरुद्ध मुंबई आणि गुजरातमधील विविध पोलीस ठाण्यांत २० पेक्षा अधिक चोरी व घरफोडीचे गुन्हे नोंद असल्याचे समोर आले आहे.
रामानंद नगर पोलीस ठाणे आणि स्थानिक गुन्हे शाखेच्या पथकाने संयुक्त तपास करून हा गुन्हा उघडकीस आणला. या कारवाईत पोलीस नाईक हेमंत कळसकर व पोलीस कर्मचारी गोविंदा पाटील यांनी विशेष कामगिरी बजावली. तसेच सहाय्यक पोलीस उपनिरीक्षक सचिन रणेशवरे, सुशिल चौधरी, जितेंद्र राजपूत, विनोद सुर्यवंशी, तसेच गुन्हे शाखेचे शरद बागल, अक्रम शेख व प्रितम पाटील यांचा सहभाग होता. पुढील तपास पोलीस उपनिरीक्षक सचिन रणेशवरे करीत आहेत.
