१९ दिवसांपासून फरार असलेल्या तिसऱ्या आरोपीला अटक, २७ हजारांचा मुद्देमाल जप्त
जळगाव : एमआयडीसी परिसरातील जगवाणी नगर येथे झालेल्या घरफोडीतील १९ दिवसांपासून फरार असलेल्या तिसऱ्या आरोपीला एमआयडीसी पोलिसांनी अटक केली आहे. आरोपीकडून २७ हजार रुपये किमतीच्या ५० किलो तांब्याच्या तारा जप्त करण्यात आल्या आहेत.
१६ ते २७ एप्रिल २०२५ दरम्यान जगवाणी नगरमधील एका दुकानाचे शटर वाकवून १८,५०० रुपये किमतीच्या जुन्या आणि नव्या तांब्याच्या तारा चोरीला गेल्या होत्या. या प्रकरणी एमआयडीसी पोलीस ठाण्यात भारतीय न्याय संहिता २०२३ च्या विविध कलमांखाली गुन्हा दाखल करण्यात आला होता.
गुन्ह्याचा तपास करण्यासाठी पोलीस निरीक्षक बबन आव्हाड यांनी पोलीस उपनिरीक्षक राहुल तायडे, सहायक फौजदार विजयसिंग पाटील, पोलीस हेड कॉन्स्टेबल गणेश शिरसाळे, पोलीस नाईक प्रदीप चौधरी आणि पोलीस कॉन्स्टेबल निलेश पाटील यांचे पथक नेमले होते. या पथकाने २ मे २०२५ रोजी या गुन्ह्यातील दोन आरोपींना अटक केली होती.
परंतु, या गुन्ह्यातील तिसरा आरोपी शिकवणसिंग बरियामसिंग उर्फ पटमलसिंग टाक हा तेव्हापासून फरार होता. ४ ऑगस्ट २०२५ रोजी तो वाघनगर परिसरात फिरत असल्याची माहिती सहायक फौजदार विजयसिंग पाटील आणि पोलीस नाईक प्रदीप चौधरी यांना गुप्त बातमीदाराकडून मिळाली. त्यांनी तात्काळ त्याला ताब्यात घेऊन गुन्ह्यात हजर केले.
पोलिसांनी त्याला दोन दिवसांची पोलीस कोठडी घेतली असता, चौकशीत त्याने २७ हजार रुपये किमतीचे ५० किलो जुने-नवे तांब्याचे तार काढून दिले. पोलिसांनी हा मुद्देमाल जप्त केला आहे. या गुन्ह्याचा पुढील तपास पोलीस उपनिरीक्षक राहुल तायडे आणि पोलीस कॉन्स्टेबल निलेश पाटील करत आहेत.
ही कारवाई पोलीस अधीक्षक महेश्वर रेड्डी, अपर पोलीस अधीक्षक अशोक नखाते, पोलीस उपअधीक्षक संदीप गावीत आणि पोलीस निरीक्षक बबन आव्हाड यांच्या मार्गदर्शनाखाली करण्यात आली.
