महा पोलीस न्यूज । चेतन वाणी । तापी पाटबंधारे विकास महामंडळातील कथित भ्रष्टाचार आणि आर्थिक गैरव्यवहार उघड करणाऱ्या अजय भागवत बढे यांना पाटबंधारे प्रकल्प मंडळाचे प्रभारी अधीक्षक अभियंता गोकुळ श्रावण महाजन यांनी जीवे मारण्याची धमकी दिल्याचा धक्कादायक प्रकार समोर आला आहे. ही घटना २२ सप्टेंबर २०२५ रोजी लाभ क्षेत्र विकास प्राधिकरण कार्यालयाजवळ घडली. याप्रकरणी पोलिसात तक्रार दाखल करण्यात आली आहे.
तक्रार अर्जानुसार, अजय बढे यांनी तापी पाटबंधारे विभागातील गैरप्रकारांबाबत तक्रार केली होती. त्यावर मुख्य अभियंत्यांच्या आदेशानुसार चौकशी करणाऱ्या लाभ क्षेत्र विकास प्राधिकरणाचे अधीक्षक अभियंता श्री.भोसले यांना कागदपत्रे देण्यासाठी बढे दुपारी १२ वाजता कार्यालयात गेले होते. भोसले कार्यालयात नसल्याने बाहेर पडत असताना खालच्या मजल्यावर असलेल्या जळगाव पाटबंधारे प्रकल्प कार्यालयात महाजन यांची आणि बढे यांची भेट झाली. यावेळी महाजन यांनी, “आमच्याविरोधात तक्रारी करतोस? तुझा कार्यक्रम लावून टाकतो, जीव वाचणार नाही,” अशी उघड धमकी दिली. या प्रकरणी जिल्हा पेठ पोलीस ठाण्यात अदखलपात्र गुन्हा नोंदवण्यात आला आहे.
पोलिस संरक्षणाची मागणी
अजय बढे यांनी जिल्हा पोलीस अधीक्षकांकडे तक्रार दाखल करून महाजन आणि त्यांच्या सहकाऱ्यांपासून स्वतःच्या आणि कुटुंबीयांच्या जीवाला असलेल्या धोक्यामुळे पोलिस संरक्षणाची मागणी केली आहे.
जुन्या प्रकरणांचा उल्लेख
यापूर्वी, शेततळ्याच्या कामाच्या नावाखाली अजय बढे यांची ४५ लाख रुपयांची फसवणूक केल्याप्रकरणी सेवानिवृत्त वरिष्ठ अभियंता व्ही.डी. पाटील, कार्यकारी अभियंता गोकुळ महाजन आणि इतरांविरुद्ध रामानंद नगर पोलीस ठाण्यात गुन्हा दाखल आहे. या प्रकरणातील संशयीत आरोपी सध्या जामिनावर आहेत. तसेच, बोदवड उपसा सिंचन योजनेतील वाळू तस्करी आणि शासकीय निधीच्या गैरव्यवहाराच्या तक्रारीवर आधारित जिल्हाधिकाऱ्यांनी अमळनेरच्या प्रांताधिकाऱ्यांच्या अध्यक्षतेखाली तीन सदस्यीय चौकशी समिती नेमली आहे.
माझ्या जीवाला काही झाल्यास..
बढे यांनी यापूर्वी 13 मार्च 2025 रोजीही जीवाला धोका असल्याची तक्रार पोलिस अधीक्षकांकडे केली होती. मात्र, त्यावर कोणतीही ठोस कारवाई न झाल्याने आरोपींचे मनोबल वाढल्याचा आरोप त्यांनी केला आहे. “माझ्या जीवाला काही झाल्यास त्याची जबाबदारी महाजन आणि संबंधित पोलिसांवर असेल,” असे त्यांनी म्हटले आहे.
सर्वत्र संताप आणि कारवाईची मागणी
भ्रष्टाचार उघड करणाऱ्या व्यक्तीला उघडपणे धमकी देणाऱ्यांवर कठोर कारवाई व्हावी, अशी मागणी सामाजिक स्तरावरून होत आहे. पोलिसांनी या प्रकरणाची गंभीर दखल घेऊन तपास त्वरित पूर्ण करावा, अशी अपेक्षा व्यक्त केली जात आहे.
