शिरसोली येथे माहेरी पाच महिन्यांच्या गर्भवती विवाहितेचीआत्महत्या

जळगावः चाळीसगाव तालुक्यातील कर्जयी येथे राहणाऱ्या प्रज्ञा चेतन शेळके (वय २२) या पाच महिन्यांच्या गर्भवती विवाहितेने कौटुंबिक छळाला कंटाळून आत्महत्या केल्याची धक्कादायक घटना समोर आली आहे. गर्भपात करण्यास नकार दिल्याने आणि गर्भपात करण्यासाठी सासरचे लोक त्रास देत असल्याचा आरोप प्रज्ञाच्या कुटुंबीयांनी केला आहे. प्रज्ञाने आत्महत्या करण्यापूर्वी लिहिलेली सुसाईड नोट पोलिसांनी जप्त केली असून, त्यात तिने सासरच्या लोकांवर गंभीर आरोप केले आहेत.

​प्रज्ञाचा विवाह कर्जयी येथील चेतन शेळके याच्याशी झाला होता. लग्नानंतर हे दोघे पुण्यात राहत होते. प्रज्ञा पाच महिन्यांची गर्भवती असल्याने गेल्या एक महिन्यापासून ती जळगाव तालुक्यातील शिरसोली प्र. न. येथील माहेरी आली होती. गुरुवारी (१८ सप्टेंबर) सकाळी तिचे आई-वडील शेतात गेले होते, तर भाऊ पुण्याला गेला होता. दुपारी ३ वाजण्याच्या सुमारास घरात कोणीही नसताना प्रज्ञाने गळफास घेऊन आपले जीवन संपवले.

​आई-वडील शेतातून परतल्यानंतर घराचा दरवाजा आतून बंद दिसला. त्यांनी आवाज देऊनही प्रतिसाद न मिळाल्याने दरवाजा तोडून आत प्रवेश केला. आतमध्ये प्रज्ञा गळफास घेतलेल्या अवस्थेत दिसली. त्यांनी तातडीने तिला खाली उतरवून जिल्हा शासकीय रुग्णालय व महाविद्यालयात दाखल केले. मात्र, डॉक्टरांनी तपासणीनंतर तिला मृत घोषित केले.

​प्रज्ञाच्या माहेरच्यांनी दिलेल्या माहितीनुसार, सासरचे लोक तिला सतत मारहाण करून गर्भपात करण्यासाठी दबाव टाकत होते. याच छळाला कंटाळून प्रज्ञाने हे टोकाचे पाऊल उचलल्याचा आरोप तिच्या कुटुंबीयांनी केला आहे. या प्रकरणाची पुढील चौकशी सुरू आहे.

आत्महत्येपूर्वी लिहिली सुसाईड नोट

मीस यू मम्मी-पप्पा…

मी प्रज्ञा चेतन शेळके माझ्यावर अत्याचार झाला आहे, मला माझ लग्र झाल मी कामाला जायची, ज्यावेळेस मी प्रेग्रेट राहीली. त्यावेळेस माझ्या घरच्यांनी मला क्रिटींक करायला सांगितले, तर मी नाही म्हणत होती. त्यांनी मला गावावर आणून मारहाणही केली. मी माझ्या आई-वडीलांना सांगितले तर त्यांनी त्यांचे नातेवाईक जमा केले. माझ्या मावस सासू सासऱ्यांनी मला मारहाण केली.

माझे सासू-सासरे व दीर, नवरा मला मारहाण करायला लागले. माझ्या आई-वडीलांसोबत त्यांच्याकडे आली, तर त्यांनी लय टेंशन घेतले. त्यांनी माझ्या लहान मुलीच अस कसकाय झाल अस म्हणून लय टेंशन घेतल होत. त्यांनी ट्रिटमेंट केली तर माझ्या मनाला योग्य नाही वाटल. मी मानसिक तणावामुळे आत्महत्या केली. मला माफ करा मम्मी-पप्पा सॉरी.. असा मजकूर विवाहितेने आत्महत्येपुर्वी लिहीलेल्या सुसाईट नोटमध्ये लिहीला आहे.