सराईत घरफोड्या गजाआड ; लाखाचा मुद्देमाल जप्त
दोन गुन्ह्यांची उकल ; चोपडा शहर पोलिसांची कारवाई
चोपडा प्रतिनिधी शहरातील घरफोडी प्रकरणात चोपडा शहर पोलिसांनी सराईत आरोपीला अटक करून तब्बल १ लाख ४ हजार ७०० रुपयांचा मुद्देमाल हस्तगत केला आहे. आरोपी हा नंदुरबार जिल्ह्यातील रहिवासी असून, त्याच्यावर शहादा व दोंडाईचा पोलीस ठाण्यात एकूण १० ते १२ घरफोड्यांचे गुन्हे दाखल असल्याचे समोर आले आहे.
प्राप्त माहितीनुसार, विजय नारायण बाविस्कर (वय ६९, रा. देशमुख नगर, यावल रोड, चोपडा) यांच्या घरात २९ सप्टेंबरच्या रात्री ११ ते ३० सप्टेंबरच्या पहाटे ५ वाजेदरम्यान अज्ञात व्यक्तीने घरफोडी करून सोन्याचे दागिने व मोबाईल फोन असा ऐवज चोरी केला होता. या प्रकरणी चोपडा शहर पोलिस ठाण्यात गुन्हा दाखल करण्यात आला होता.
तपासादरम्यान चोरीस गेलेल्या मोबाईलच्या तांत्रिक माहितीच्या आधारे पोलिसांनी सापळा रचून प्रकाश विजय पावरा (वय २८, रा. तोरणमाळ, ता. धडगाव, जि. नंदुरबार) या आरोपीस शिरपूर शहरातून १२ ऑक्टोबर रोजी ताब्यात घेतले. चौकशीत त्याने चोपड्यातील घरफोडी केल्याची कबुली दिली.
पोलिसांनी त्याच्याकडून सोन्याच्या २ अंगठ्या व ३ सोन्याच्या बाळया , सोन्याची साखळी (सुमारे २० हजार रुपये किंमत) ,टेक्नोस्पार्क कंपनीचा मोबाईल , चांदीची चैन व पैंजण ,यमाहा YBR-110 दुचाकी (MH 18 AF 9582) असा एकूण मुद्देमाल किंमत १,०४,७०० रुपये जप्त केला आहे.
यातील काही दागिने हे जून महिन्यात झालेल्या दुसऱ्या घरफोडी प्रकरणातील असल्याचेही पोलिसांच्या तपासात निष्पन्न झाले आहे. आरोपीने चोरीचा माल वाघबडली (ता. शिरपूर) येथील शेतात मोटारसायकलमध्ये लपवून ठेवला होता.
ही कारवाई पोलीस अधीक्षक महेश्वर रेड्डी, अपर पोलीस अधीक्षक कविता नेरकर, आणि उपविभागीय अधिकारी अण्णासाहेब घोलप यांच्या मार्गदर्शनाखाली पोलीस निरीक्षक मधुकर साळवे यांच्या नेतृत्वात करण्यात आली. या पथकात सपोनि एकनाथ भिसे, पोउपनि चेतन परदेशी, पोहवा ज्ञानेश्वर जवागे, पोशि मदन पावरा, अजिंक्य माळी, योगेश पाटील, विलास पारधी यांचा समावेश होता.
या कारवाईत चोपडा पोलिसांनी सलग दोन घरफोडी प्रकरणांची उकल करण्यात यश मिळवले असून, पुढील तपास पोउपनि चेतन परदेशी करीत आहेत.
