दारू पिण्यासाठी पैसे देण्यास पत्नीचा नकार; संतापलेल्या पतीने चाकूने पोटावर वार करून पत्नीची हत्या
दारू पिण्यासाठी पैसे देण्यास पत्नीचा नकार; संतापलेल्या पतीने चाकूने पोटावर वार करून पत्नीची हत्या
भडगाव तालुक्यातील वसंतवाडी तांड्यावर खळबळ
भडगाव (प्रतिनिधी):
तालुक्यातील वसंतवाडी तांडा येथे रविवारी सकाळी साडेआठच्या सुमारास घडलेल्या कौटुंबिक वादाचे पर्यवसान थेट हत्येत झाल्याने परिसरात एकच खळबळ उडाली. दारू पिण्यासाठी पैसे देण्यास पत्नीने नकार दिल्याच्या तसेच आरोपी हा पत्नीला शेती विक्री करण्यास सांगत होता मात्र मयत हिने शेती विकण्यास नकार दिल्याचे
रागातून पतीने तिच्यावर चाकूने जीवघेणा हल्ला केल्याची धक्कादायक घटना घडली. या हल्ल्यात पत्नीचा जागीच मृत्यू झाला.
मिळालेल्या माहितीनुसार, आत्माराम पतीलाल राठोड (वय ४०) याने त्याची पत्नी ललिता आत्माराम राठोड (वय ३६) हिच्याकडे दारू पिण्यासाठी पैशांची मागणी केली होती. मात्र ललिता यांनी पैसे देण्यास नकार दिल्याने दोघांमध्ये वाद झाला. या वादातून संतापलेल्या आत्माराम राठोड याने चाकूने पत्नीच्या पोटावर वार केले. गंभीर जखमी झालेल्या ललिता राठोड यांचा घटनास्थळीच मृत्यू झाला.
घटनेची माहिती मिळताच भडगाव पोलीस तातडीने घटनास्थळी दाखल झाले. पोलिसांनी आरोपी आत्माराम राठोड याला तात्काळ ताब्यात घेतले असून पुढील चौकशी सुरू आहे. तसेच घटनेचे गांभीर्य लक्षात घेऊन फॉरेन्सिक पथकाला घटनास्थळी पाचारण करण्यात आले. पथकाने घटनास्थळाची पाहणी करून आवश्यक पुरावे संकलित केले.
मृतदेह शवविच्छेदनासाठी ग्रामीण रुग्णालय, भडगाव येथे हलविण्यात आला. शवविच्छेदनानंतर मृत महिलेचे भाऊ प्रकाश मेहराम चव्हाण (रा. दळवेल, ता. पारोळा) यांच्या फिर्यादीवरून भडगाव पोलीस ठाण्यात गुन्हा रजिस्टर क्रमांक २४०/२०२६ अन्वये भारतीय न्याय संहिता बी.एन.एस कलम १०३(१) अंतर्गत खुनाचा गुन्हा दाखल करण्यात आला आहे.
या प्रकरणाचा पुढील तपास महिला पोलीस उपनिरीक्षक लक्ष्मी कारंकार करीत आहे.
