मध्य प्रदेशातून येणारी बैलांची गाडी गोरक्षक दलाने पकडली
वडती-विष्णापूर रस्त्यावर कारवाई; गाडी व चालक अडावद पोलिसांच्या ताब्यात, पोलीस चौकी उभारण्याची ग्रामस्थांची मागणी
अडावद, प्रतिनिधी : वडती-विष्णापूर रस्त्यावर मध्य प्रदेशातून येणारी बैलांची गाडी वडती येथील गोरक्षक दलाने मंगळवारी सायंकाळी अडवली. गाडीमध्ये दोन बैल आढळून आल्यानंतर गोरक्षक दलाने तत्काळ अडावद पोलिसांशी संपर्क साधून गाडी आणि चालकाला पोलिसांच्या ताब्यात दिले.
गाडीचा क्रमांक एमएच १९ सीएक्स २८३० असून ती सुपर कॅरी प्रकारातील आहे. या प्रकरणी अडावद पोलिसांनी गुन्हा दाखल केला असून, गाडी व संबंधित व्यक्तींची चौकशी सुरू केली आहे.
पोलीस चौकी उभारण्याची मागणी
या घटनेनंतर वडती व विष्णापूर येथील ग्रामस्थांनी विष्णापूर रस्त्यावर कायमस्वरूपी पोलीस चौकी उभारण्याची मागणी केली आहे. मध्य प्रदेशातून या मार्गाने ये-जा करणाऱ्या संशयित वाहनांची नियमित तपासणी झाल्यास अवैध वाहतूक रोखण्यास मदत होईल, अशी ग्रामस्थांची भूमिका आहे.
गोरक्षक दलाने वेळीच पोलिसांना माहिती दिल्याने कारवाई करणे शक्य झाले. या प्रकरणाचा पुढील तपास अडावद पोलीस करीत असून, चौकशीनंतर पुढील कायदेशीर कारवाई केली जाणार आहे.
