जळगाव : स्थानिक गुन्हे शाखेने (LCB) एका तरुणाकडून देशी बनावटीचे पिस्तूल आणि पाच जिवंत काडतुसे जप्त केली आहेत. याप्रकरणी यावल पोलीस ठाण्यातील एका गुन्ह्याचा तपास सुरू असताना ही कारवाई करण्यात आली.
यावल पोलीस ठाण्याच्या गुन्ह्यातील एका आरोपीची स्थानिक गुन्हे शाखेने चौकशी केली असता, त्याने शिवाजी नगर, जळगाव येथील अक्षय अजय जयस्वाल (वय २४) याला एक देशी बनावटीचे पिस्तूल विकल्याची माहिती दिली.
या माहितीनंतर स्थानिक गुन्हे शाखेचे वरिष्ठ पोलीस निरीक्षक संदीप पाटील यांनी पोलीस उपनिरीक्षक शरद बागल यांच्या नेतृत्वाखाली एक पथक तयार करून अक्षय जयस्वालचा शोध घेण्याचे आदेश दिले. पथकाने जळगाव शहरात शोध घेतला असता, अक्षय जयस्वाल हा आंबेडकर मार्केट परिसरात त्याच्या मोटारसायकलवर (क्र. MH १९ BK ८८९३) संशयास्पद अवस्थेत बसलेला आढळला.
पोलिसांनी त्याला ताब्यात घेऊन अग्नीशस्त्राबद्दल विचारणा केली असता, त्याने ते पिस्तूल मोटारसायकलच्या सीटखाली लपवून ठेवल्याचे सांगितले. पोलिसांनी मोटारसायकलची झडती घेतली असता, सीटखाली एक देशी बनावटीचे लोखंडी पिस्तूल मॅगझीनसह आणि ५ जिवंत काडतुसे (अंदाजे किंमत ४०,००० रुपये) मिळून आली. पोलिसांनी तो मुद्देमाल जप्त केला आहे.
ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि उपविभागीय पोलीस अधिकारी संदीप गावीत यांच्या मार्गदर्शनाखाली वरिष्ठ पोलीस निरीक्षक संदीप पाटील, पोलीस उपनिरीक्षक शरद बागल, पोलीस हेड कॉन्स्टेबल अक्रम शेख धनगर, प्रवीण भालेराव, नितीन बाविस्कर, पोलीस नाईक किशोर सोनवणे, पोलीस कॉन्स्टेबल सिद्धेश्वर डापकर आणि गोपाल पाटील यांच्या पथकाने केली
