महा पोलीस न्यूज । चेतन वाणी । जळगाव शहरातील सागर पार्क मैदान खेळासाठी आरक्षण न देणेबाबत आगामी मनपा महासभेत विषय ठेवण्यात येणार होता. नगरसेवक नितीन बरडे यांनी मांडलेल्या या ठरावाला समस्त क्रिकेट प्रेमींकडून विरोध होत होता. भाजप पक्षश्रेष्ठी आणि आमदार राजुमामा भोळे यांच्यापर्यंत हा विषय पोहचल्याने त्यात आज तोडगा निघाला आहे.
जळगावकर क्रिकेटप्रेमी आणि खेळाडूंसाठी हक्काचे ठिकाण मानले जाणारे महापालिकेचे सागर पार्क मैदान आता खेळासाठी उपलब्ध न ठेवण्याचा प्रस्ताव महासभेच्या अजेंड्यावर ठेवण्यात आला आहे. यावर १४ मे रोजी चर्चा होणार आहे. नगरसेवक नितीन बरडे यांनी हा प्रस्ताव आणला आहे. या प्रस्तावामुळे क्रीडा वर्तुळात तीव्र नाराजी पसरली आहे.
जळगावातील क्रीडा प्रेमी आणि क्रिकेट प्रेमींनी एकजूट दाखवत या निर्णयाला विरोध दर्शवला होता. खेळाडूंनी हा विषय आमदार राजुमामा भोळे आणि मनपा उपमहापौर मनोज चौधरी यांच्याकडे मांडला होता. तसेच पक्षातील वरिष्ठ नेत्यांकडे देखील आपली कैफियत मांडली होती. अखेर आज या विषयावर पक्षांतर्गत चर्चा झाली.
मिळालेल्या माहितीनुसार, आज पक्षांतर्गत बैठकीत या विषयावर जोरदार चर्चा झाली. सागर पार्क मैदानावर खेळाला बंदी न घालता काही अटी शर्ती घालून देण्यात येणार आहे. त्यात डीजे बंदी, साउंड सिस्टिम असल्यास कमी आवाज, १० वी, १२ वी परीक्षा काळात खेळाला बंदी असे काही नियम लागू करण्यात येणार आहेत. आ.राजुमामा भोळे यांनी देखील या वृत्ताला दुजोरा दिला आहे.
