महा पोलीस न्यूज । चेतन वाणी । शहरातील रामेश्वर कॉलनी परिसरातून चोरीस गेलेली स्विफ्ट डिझायर कार एमआयडीसी पोलिसांनी केवळ तीन दिवसांत शोधून काढत आरोपीला जेरबंद केले आहे. या कारवाईनंतर पोलिसांनी छत्रपती संभाजीनगर येथून चोरी गेलेले चारचाकी वाहन हस्तगत केले असून सुमारे ४.५ लाख रुपये किमतीची ही कार परत मिळाल्याने फिर्यादीने सुटकेचा निश्वास टाकला आहे.
फिर्यादी यांनी १९ नोव्हेंबर रोजी रात्री ८ वाजता मारुती स्विफ्ट डिझायर कार घरासमोर पार्क केली होती. मात्र २० नोव्हेंबर रोजी सकाळी कार दिसली नाही. परिसरात शोध घेतल्यानंतरही वाहन न मिळाल्याने अज्ञात व्यक्तीने कारची चोरी केल्याची खात्री पटली. यानंतर एमआयडीसी पोलिसांनी गुन्हा क्रमांक ८५७/२०२५ भा.दं.सं. २०२३ कलम ३०३(२) नुसार कारचोरीचा गुन्हा नोंदविला.
एमआयडीसी पोलिसांनी गुप्त बातम्यांवर कार्यवाही करत परिसरातील सीसीटीव्ही फुटेजचे बारकाईने विश्लेषण केले. त्यातून कारचोरी करणाऱ्या आरोपीची हालचाल व ओळख स्पष्ट झाली. पोलिसांनी नवानाथ नगर भागात सापळा रचून २३ नोव्हेंबर रोजी आरोपीला अटक केली. त्याने आपले नाव विनय मनोहर जाधव (रा.नवनाथ नगर, जळगाव) असे सांगत चोरीची कबुली दिली. त्याने चोरी केलेली कार छत्रपती संभाजीनगर येथे नेल्याचेही उघड झाले.
आरोपीच्या कबुलीच्या आधारे पोलिसांनी तत्काळ छत्रपती संभाजीनगर येथे धाड टाकत सुमारे ४,५०,००० रुपये किमतीची स्विफ्ट डिझायर कार जप्त केली. वाहन सुरक्षित स्थितीत मिळाले असून पुढील तपास सुरू आहे.
ही कामगिरी एमआयडीसी पोलिस स्टेशनचे पोलीस निरीक्षक बबन आव्हाड यांच्या सुचनेनुसार गुन्हे शोध पथकाने केली. पथकात पोउनि राहुल तायडे, पोउनि चंद्रकांत धनके, सफौ विजयसिंग पाटील, पोह. प्रदीप चौधरी, पोह. रमेश चौधरी, पोह. प्रमोद लाडवंजारी, पोह. किरण चौधरी, पोह. गिरीश पाटील, पोकॉ विशाल कोळी, पोकॉ नितीन ठाकूर, पोकॉ किरण पाटील, पोकॉ शशिकांत मराठे, पोकॉ नरेंद्र मोरे यांचा समावेश होता.
संपूर्ण कारवाई पोलीस अधीक्षक डॉ.महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे व पोनि बबन आव्हाड यांच्या मार्गदर्शनाखाली पार पडली.
