महा पोलीस न्यूज । चेतन वाणी । बीड जिल्ह्यातील राष्ट्रीय महामार्ग भूसंपादन घोटाळा प्रकरणाने आता नवे वळण घेतले आहे. विशेष तपास पथकाने (एसआयटी) तत्कालीन जिल्हाधिकारी अविनाश पाठक यांना ताब्यात घेतले असून, या प्रकरणातील ७३ कोटी रुपयांच्या फसवणुकीचा तपास वेगाने पुढे सरकत आहे. अविनाश पाठक यांच्या नावाने बनावट आदेश जारी करून शासनाची फसवणूक करण्यात आल्याचा गंभीर आरोप असून, एसआयटीने त्यांची सखोल चौकशी केल्यानंतर अटकेचा निर्णय घेतला.
मिळालेल्या माहितीनुसार, सोलापूर-धुळे राष्ट्रीय महामार्गाच्या बांधकामासाठी संपादित केलेल्या जमिनींचा मोबदला वाढवण्याच्या नावाखाली मोठ्या प्रमाणात फसवणूक करण्यात आली. एकूण १५४ प्रकरणांमध्ये वाढीव मोबदल्याच्या बनावट आदेश जारी करून ७३ कोटी रुपयांची फसवणूक झाल्याचे तपासात उघड झाले आहे. याशिवाय, आणखी २४३ कोटी रुपयांचे बोगस प्रस्ताव मंजुरीसाठी सादर करण्यात आले होते, ज्यामुळे घोटाळ्याची व्याप्ती आणखी वाढली आहे.
अविनाश पाठक हे २२ एप्रिल २०२५ रोजी बीडचे जिल्हाधिकारी पदावरून बदली झाले, तरी त्यांच्या कार्यकाळातील मागच्या तारखा १ मार्च ते १७ एप्रिल २०२५ वापरून बनावट आदेश तयार करण्यात आले. एसआयटीने पाठक यांची प्राथमिक चौकशी केल्यानंतर त्यांचा सविस्तर लेखी जबाब घेतला होता. ७ जानेवारी रोजी त्यांनी स्वतः एसआयटीसमोर हजर होऊन जबाब नोंदवला. मात्र, चौकशीदरम्यान त्यांच्या सह्यांचे नमुने घेण्यात आले असून, बनावट सहीचा मुद्दा गंभीर स्वरूपाचा असल्याने अटक करण्यात आली आहे.
राष्ट्रीय महामार्ग भूसंपादन घोटाळा प्रकरणात संपूर्ण महाराष्ट्राचे लक्ष लागलेले आहे. बीड जिल्ह्यातील या फसवणुकीमुळे शासनाच्या कोट्यवधी रुपयांचे नुकसान झाले असून, स्थानिक शेतकरी आणि महामार्ग प्रकल्पाच्या कामगारांवरही परिणाम झाला आहे. एसआयटीने आतापर्यंत महत्त्वाच्या साक्षीदारांचे जबाब नोंदवले असून, पाठक यांच्या व्यतिरिक्त इतर अधिकाऱ्यांवरही शोधक नजर ठेवली आहे. तत्कालीन जिल्हाधिकारी म्हणून पाठक यांनी बीड जिल्हा परिषदेचे मुख्य कार्यकारी अधिकारी म्हणूनही जबाबदारी सांभाळली होती, ज्यामुळे त्यांच्या भूमिकेवर प्रश्नचिन्ह उपस्थित झाले आहे.
अविनाश पाठक यांची तडकाफडकी बदली झाल्यानंतर विवेक जॉन्सन यांची नियुक्ती झाली, पण घोटाळ्याचा तपास मात्र सुरूच राहिला. यापूर्वी माजलगाव कोर्टाने पाठक यांच्या गाडीची जप्ती केली होती, ज्यामुळे जिल्हाभर खळबळ उडाली होती. आता अविनाश पाठक यांना ताब्यात घेतल्याने राजकीय वर्तुळातही चर्चांना उधाण आले आहे.
या घोटाळा प्रकरणाचा तपास पुढे गेल्यास आणखी आरोपींच्या नावांचा भंडाफोड होण्याची शक्यता आहे. बीडवासींमध्ये या अटकेमुळे समाधान व्यक्त होत असले, तरी संपूर्ण प्रकरणाचा अंतिम निकाल कधी मिळेल याबाबत उत्सुकता आहे.
