पूरग्रस्त विद्यार्थ्यांच्या शिक्षणाला आधार; ममुराबाद येथे शैक्षणिक साहित्याचे वाटप
महाराष्ट्र राज्य मराठी पत्रकार संघ व प्रज्ञावंत फाउंडेशनचा सामाजिक उपक्रम; आदिवासी विद्यार्थ्यांना दप्तर, वह्या व शैक्षणिक साहित्याचे वितरण
जळगाव | प्रतिनिधी
जळगाव तालुक्यातील ममुराबाद येथे ३१ जुलै रोजी झालेल्या अतिवृष्टीमुळे आदिवासी वस्तीत मोठ्या प्रमाणावर पाणी शिरून जनजीवन विस्कळीत झाले होते. या नैसर्गिक आपत्तीनंतर तातडीने मदतकार्य राबविण्यात आल्यानंतर आता पूरग्रस्त विद्यार्थ्यांच्या शिक्षणाला हातभार लावण्यासाठी महाराष्ट्र राज्य मराठी पत्रकार संघ, मुंबई आणि प्रज्ञावंत फाउंडेशन, जळगाव यांच्या संयुक्त विद्यमाने शैक्षणिक साहित्य वाटपाचा उपक्रम राबविण्यात आला.
या उपक्रमांतर्गत विद्यार्थ्यांना दप्तर, वह्या, कंपास बॉक्स तसेच अन्य आवश्यक शैक्षणिक साहित्याचे वितरण करण्यात आले. महाराष्ट्र राज्य मराठी पत्रकार संघाचे राज्य कार्याध्यक्ष तथा प्रज्ञावंत फाउंडेशनचे संचालक प्रविण सपकाळे यांच्या हस्ते विद्यार्थ्यांना साहित्य देण्यात आले.
यावेळी ममुराबादचे सरपंच हेमंत चौधरी, ग्रामपंचायत सदस्य गोपाल मोरे, महाराष्ट्र राज्य मराठी पत्रकार संघाच्या डिजिटल मीडिया विभागाचे जळगाव महानगर अध्यक्ष विक्रम कापडणे, सतीश सैंदाणे, भूषण बोरसे, अशोक मोरे, प्रकाश माळी, मच्छिंद्र सोनवणे, सुकलाल माळी तसेच ग्रामस्थ आणि समाजबांधव मोठ्या संख्येने उपस्थित होते.
यावेळी बोलताना प्रविण सपकाळे यांनी, आपत्तीमुळे विद्यार्थ्यांच्या शिक्षणात कोणताही खंड पडू नये, हा या उपक्रमामागील प्रमुख उद्देश असल्याचे सांगितले. गरजू व आपत्तीग्रस्त विद्यार्थ्यांच्या शिक्षणासाठी समाजाने एकत्र येणे ही काळाची गरज असून, अशा सामाजिक उपक्रमांमुळे विद्यार्थ्यांना नव्या उमेदीने शिक्षण सुरू ठेवण्याची प्रेरणा मिळते, असेही त्यांनी नमूद केले. उपस्थितांनी या उपक्रमाचे कौतुक करत समाजाप्रती असलेली संघटनेची बांधिलकी अधोरेखित केली.
