मास्टर कीने मोटारसायकली चोरणारा अट्टल चोरटा जेरबंद; पाचोरा पोलिसांची धडाकेबाज कारवाई

मास्टर कीने मोटारसायकली चोरणारा अट्टल चोरटा जेरबंद; पाचोरा पोलिसांची धडाकेबाज कारवाई

चार चोरीच्या बजाज प्लॅटिना मोटारसायकलींसह १.२० लाखांचा मुद्देमाल जप्त; विविध पोलीस ठाण्यांतील गुन्हे उघड

पाचोरा | प्रतिनिधी : पाचोरा पोलीस ठाण्याच्या गुन्हे शोध पथकाने वाहन चोरीच्या गुन्ह्यांचा यशस्वी तपास करत मास्टर कीच्या साहाय्याने मोटारसायकली चोरणाऱ्या अट्टल चोरट्याला अटक केली आहे. आरोपीकडून चोरीच्या चार बजाज प्लॅटिना मोटारसायकली जप्त करण्यात आल्या असून, जप्त मुद्देमालाची एकूण किंमत ₹१ लाख २० हजार इतकी आहे.

जळगाव जिल्ह्यासह पाचोरा शहरात वाढत्या मोटारसायकल चोरीच्या घटनांच्या पार्श्वभूमीवर पोलीस अधीक्षक श्रीकांत धिवरे यांनी चोरीचे गुन्हे उघड करून आरोपींना अटक करण्याच्या सूचना दिल्या होत्या. त्यानुसार पोलीस निरीक्षक राहुलकुमार पवार यांच्या मार्गदर्शनाखाली पाचोरा पोलीस ठाण्याच्या पथकाने तपास सुरू केला.

तपासादरम्यान मिळालेल्या गोपनीय माहितीनुसार, अमोल राजेंद्र ढमाळे (वय २७, रा. नंदीचे खेडगाव, ता. पाचोरा, ह.मु. काळे नगर, जळगाव) हा जळगाव रोडलगत शेतातील शेडमध्ये लपून राहत असल्याची माहिती पोलिसांना मिळाली. त्यानुसार सापळा रचून त्याला ताब्यात घेण्यात आले. चौकशीत त्याने चार मोटारसायकली चोरी केल्याची कबुली दिली.

पोलिसांच्या तपासात आरोपी मास्टर कीच्या साहाय्याने बजाज प्लॅटिना मोटारसायकली चोरी करत असल्याचे उघड झाले. त्याच्याकडून जप्त करण्यात आलेल्या चारही मोटारसायकली भडगाव, पाचोरा आणि एमआयडीसी वाळूज (छत्रपती संभाजीनगर) पोलीस ठाण्यांच्या हद्दीतून चोरीस गेल्याचे निष्पन्न झाले.

या प्रकरणी भडगाव पोलीस ठाणे गु.र.नं. २३८/२०२६, पाचोरा पोलीस ठाणे गु.र.नं. ३४९/२०२६ व ३५०/२०२६ तसेच एमआयडीसी वाळूज पोलीस ठाणे गु.र.नं. ७१३/२०२६ अंतर्गत भारतीय न्याय संहिता (BNS) कलम ३०३(२) नुसार गुन्हे दाखल आहेत.

ही कारवाई पोलीस अधीक्षक श्रीकांत धिवरे, अपर पोलीस अधीक्षक अशोक नखाते आणि उपविभागीय पोलीस अधिकारी बापू रोहम यांच्या मार्गदर्शनाखाली पोलीस निरीक्षक राहुलकुमार पवार, सपोनि प्रदीप शेवाळे, पोउपनिरीक्षक कृष्णा घायाळ, पोहेका विलास पाटील, श्रीकांत गायकवाड, उमेश पाटील, पोकॉ योगेश पाटील, संदीप पाटील आणि हरीश परदेशी यांच्या पथकाने यशस्वीरीत्या पार पाडली.