अडावद पोलीस ठाण्यात गणेश मंडळांच्या पदाधिकाऱ्यांची बैठक
अडावद | प्रतिनिधी
आगामी सण व उत्सवांच्या पार्श्वभूमीवर अडावद पोलीस ठाण्यात गणेश मित्र मंडळांचे अध्यक्ष, उपाध्यक्ष, कार्यकर्ते तसेच पत्रकारांची बैठक आयोजित करण्यात आली होती. बुधवारी (१९ ऑगस्ट) सायंकाळी झालेल्या या बैठकीस चोपडा भागाचे उपविभागीय पोलीस अधिकारी उपस्थित होते.
बैठकीत आगामी सण-उत्सव काळात सामाजिक सलोखा आणि शांतता अबाधित ठेवण्याचे आवाहन करण्यात आले. तसेच अफवा अथवा गैरसमज पसरविणाऱ्या संदेशांवर विश्वास न ठेवता कोणतीही माहिती खात्रीशीर असल्याशिवाय पुढे प्रसारित करू नये, अशा सूचना देण्यात आल्या.
उत्सवाच्या काळात कोणताही अनुचित प्रकार घडणार नाही यासाठी गणेश मंडळांच्या पदाधिकाऱ्यांनी आणि कार्यकर्त्यांनी दक्षता घ्यावी, तसेच कायदा व सुव्यवस्था राखण्यासाठी पोलीस प्रशासनास आवश्यक ते सहकार्य करावे, असे आवाहन यावेळी करण्यात आले.
या बैठकीस परिसरातील गणेश मंडळांचे पदाधिकारी, कार्यकर्ते आणि पत्रकारांसह सुमारे १७५ ते २०० सदस्यांची उपस्थिती होती.
“आगामी सण-उत्सव शांततेत आणि उत्साहपूर्ण वातावरणात पार पडावेत, यासाठी सर्वांनी सामाजिक सलोखा कायम ठेवून पोलीस प्रशासनास सहकार्य करावे. अफवा व गैरसमजांवर विश्वास न ठेवता कोणताही अनुचित प्रकार घडणार नाही, यासाठी प्रत्येकाने दक्ष राहावे.”
— सहायक पोलीस निरीक्षक, अडावद पोलीस ठाणे
