यावलमध्ये महामार्गावर दरोडा टाकणारे दोन आरोपी जेरबंद
यावल: रावेर ते चोपडा राष्ट्रीय महामार्गावर यावल शहरातील बुरुज चौकाजवळ एकाला अडवून मारहाण करून रोकड व कागदपत्रे लुटणाऱ्या दोन दरोडेखोरांना यावल पोलिसांनी अटक केली आहे. त्यांच्याकडून चोरीचा मुद्देमालही हस्तगत करण्यात आला आहे.
१७ ऑगस्ट रोजी रात्री १ वाजताच्या सुमारास रोहित प्रकाश रल (वय २४, रा. चोपडा) हे त्यांच्या महिंद्रा पिकअप गाडीतून जात असताना, दोन अज्ञात इसमांनी त्यांना थांबवले. त्यांनी रोहित यांना मारहाण करून गाडीच्या डॅशबोर्डमधील पिशवीतील रोख रक्कम आणि महत्त्वाची कागदपत्रे जबरदस्तीने काढून घेतली. या गंभीर घटनेनंतर तात्काळ यावल पोलीस ठाण्यात गुन्हा दाखल करण्यात आला.
या गुन्ह्याचे गांभीर्य लक्षात घेऊन पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि उपविभागीय पोलीस अधिकारी अनिल बडगुजर यांनी तातडीने तपास सुरू करण्याचे आदेश दिले. मिळालेल्या गोपनीय माहितीच्या आधारे पोलिसांनी या गुन्ह्यात समशेर शहा सलीम शहा (वय २७, रा. यावल) आणि त्याचा साथीदार समीर रहेमान तडवी (वय २२, रा. यावल) यांचा सहभाग असल्याचे निष्पन्न केले.
पोलिसांनी मुख्य आरोपी समशेर शहा याला जळगाव येथील गेंदालाल मिल परिसरातून आणि त्याचा साथीदार समीरला यावलमधून ताब्यात घेतले. पोलिसांनी दोघांनाही अटक करून त्यांच्याकडून चोरीस गेलेली ५,००० रुपये रोख रक्कम हस्तगत केली आहे.
सराईत गुन्हेगाराची गुन्हेगारी पार्श्वभूमी
अटक करण्यात आलेला मुख्य आरोपी समशेर शहा हा सराईत गुन्हेगार असून, त्याच्यावर यापूर्वी भुसावळ रेल्वे पोलीस ठाण्यात चोरीचे तर बाजारपेठ पोलीस ठाण्यात जबरी चोरी, घरफोडी आणि विनयभंग अशा गंभीर गुन्ह्यांची नोंद आहे.
ही यशस्वी कारवाई पोलीस निरीक्षक रंगनाथ धारबळे यांच्या नेतृत्वाखाली सहाय्यक फौजदार विजय पाचपोळे, पोलीस हवालदार वासुदेव मराठे, निलेश चौधरी, पोलीस नाईक अमित तडवी, पोलीस कॉन्स्टेबल अर्षद गवळी, ऐजाज गवळी, अनिल साळुंखे आणि सागर कोळी यांच्या पथकाने केली. पोलीस या प्रकरणाचा पुढील तपास करत आहेत.
