जळगावात ऑनलाइन सट्टा अड्ड्यावर पोलिसांचा छापा; १७ हजारांचा मुद्देमाल जप्त
जळगाव (प्रतिनिधी) – शहरातील भीमसिंग मार्केट परिसरातील महालक्ष्मी ऑनलाइन लॉटरी सेंटरवर पोलिसांनी बुधवारी दुपारी छापा टाकून अवैधरित्या सुरू असलेल्या ऑनलाइन सट्टा व्यवहाराचा पर्दाफाश केला. या कारवाईत सुमारे १७ हजार १५० रुपयांचा मुद्देमाल जप्त करण्यात आला असून नरेंद्र सुरेश सोनार (वय ३९, रा. धनाजी काळेनगर) याच्याविरुद्ध गुन्हा दाखल करण्यात आला आहे.
शहर पोलीस ठाण्याचे निरीक्षक सागर शिंपी यांना मिळालेल्या गुप्त माहितीनुसार, सदर सेंटरवर ऑनलाईन सट्टा खेळविला जात असल्याचे निष्पन्न झाल्यानंतर त्यांनी सहाय्यक फौजदार सुनील पाटील, उमेश भांडारकर, योगेश पाटील, भगवान मोरे, राहुलकुमार पांचाळ यांच्यासह गुन्हे शोधपथकाचे पथक तयार करून कारवाई केली.
छाप्यात आरोपीकडून २,१५० रुपये रोख रक्कम व सट्टा खेळण्यासाठी लागणारे साहित्य असा एकूण १७,१५० रुपयांचा मुद्देमाल हस्तगत करण्यात आला. या प्रकरणी शहर पोलीस ठाण्यात गुन्हा नोंदवण्यात आला असून, पुढील तपास सुरू आहे.
