नवीन बसस्थानकातून तरुणीचा मोबाईल लांबविणारा भामटा जेरबंद
तीन मोबाईल जप्त ; जिल्हापेठ पोलिसांची कारवाई
जळगाव : प्रतिनिधी जळगाव शहरातील नवीन बसस्थानक परिसरात गर्दीचा फायदा घेत तरुणीचा मोबाईल चोरीस नेण्याच्या घटनेचा जिल्हापेठ पोलिसांनी यशस्वीपणे उलगडा केला आहे. या प्रकरणी हमीद अयुब खान (वय २२, रा. मास्टर कॉलनी, जळगाव) या तरुणास अटक करण्यात आली असून त्याच्याकडून पोलिसांनी तीन मोबाईल फोन हस्तगत केले आहेत.
याबाबत माहिती अशी की, दि. २३ डिसेंबर २०२५ रोजी पाचोरा येथील संपदा रविंद्र सोनवणे (वय २४) या स्पर्धा परीक्षेची तयारी करणाऱ्या तरुणी कॉलेजच्या कामानिमित्त जळगाव येथे आल्या होत्या. संध्याकाळी जळगाव–चाळीसगाव बसमध्ये चढताना गर्दीचा फायदा घेत अज्ञात चोरट्याने त्यांचा Redmi Note 8 मोबाईल फोन चोरीस नेला होता. या प्रकरणी जिल्हापेठ पोलीस ठाण्यात अज्ञात चोरट्याविरोधात गुन्हा दाखल करण्यात आला होता.
गुन्ह्याचा तपास पोलीस निरीक्षक प्रदीप ठाकूर यांच्या मार्गदर्शनाखाली सुरू असताना, सहायक पोलीस निरीक्षक भारती देशमुख, पोलीस कॉन्स्टेबल राहुल पाटील व नरेंद्र दिवेकर यांनी तांत्रिक तपास व गोपनीय माहितीच्या आधारे संशयित हमीद अयुब खान यास ताब्यात घेतले. चौकशीत त्याने बसस्थानक परिसरात मोबाईल चोरी केल्याची कबुली दिली. त्याच्याकडून तरुणीचा चोरीस गेलेला मोबाईल तसेच अन्य दोन मोबाईल फोन असा एकूण तीन मोबाईल हस्तगत करण्यात आले आहेत.
तरुणीचा मोबाईल लांबविणारा आरोपी हाच असल्याची खात्री पोलिसांनी केली असून पुढील तपास सुरू आहे. नवीन बसस्थानक परिसरात वारंवार मोबाईल चोरीच्या घटना घडत असल्याने प्रवाशांनी गर्दीच्या ठिकाणी विशेष दक्षता घ्यावी, असे आवाहन जिल्हापेठ पोलिसांकडून करण्यात आले आहे.
