महा पोलीस न्यूज । चेतन वाणी । जळगाव शहरातील कासमवाडी परिसरात जुन्या वादातून एका तरुणावर दोघांनी धारदार तलवार आणि कोयत्याने वार केल्याची घटना आज रात्री १२ वाजेच्या सुमारास घडली. ज्ञानेश्वर उर्फ नाना भीकन पाटील वय-२७ असे मृत तरुणाचे नाव आहे. दरम्यान, पोलिसांनी एका संशयिताला ताब्यात घेतले असल्याचं समजते.
मिळालेल्या माहितीनुसार, कासमवाडी परिसरात राहणारा ज्ञानेश्वर उर्फ नाना भीकन पाटील हा तरुण एका कंपनीत कामाला जाऊन कुटुंबाचा उदरनिर्वाह चालवत होता. ज्ञानेश्वर पाटील या तरुणाचे आपल्याच घराजवळ राहणाऱ्या एका तरुणाशी किरकोळ वाद होते. दसऱ्याच्या दिवशी रात्री १२ वाजेच्या सुमारास नाना पाटील हा घराजवळील एकता मित्र मंडळकडे उभा होता.
जुन्या वादातून दोन तरुण त्याठिकाणी आले आणि त्यांनी ज्ञानेश्वर त्याच्याशी वाद घातला. वादाचे पर्यवसान हाणामारी झाल्याने दोघांनी धारदार तलवार आणि कोयत्याने त्याच्या पोटावर, मांडीवर वार केले. इतर मित्रांनी त्याला तातडीने जिल्हा शासकीय रुग्णालयात उपचारार्थ दाखल केले आहे. अतिरक्तस्त्राव झाल्यामुळे त्याचा उपचार सुरू असताना मृत्यू झाला.
घटनेची माहिती मिळताच उपविभागीय पोलीस अधिकारी नितीन गणापुरे, एमआयडीसी पोलीस ठाण्याचे निरीक्षक बबन आव्हाड, उपनिरीक्षक चंद्रकांत धनके यांनी कर्मचाऱ्यांसह जिल्हा रुग्णालयात धाव घेतली आहे. घटनास्थळी देखील पोलीस पोहचले असून फॉरेन्सिक पथकाला पाचारण करण्यात आले आहे.
मयत ज्ञानेश्वर पाटील याच्या पश्चात आई-वडील, पत्नी आणि ३ वर्षाची मुलगी असा परिवार आहे. पोलीस मारेकऱ्यांचा शोध घेत असून दोघेही घरातून फरार झाले आहेत.
पहा संपूर्ण व्हिडिओ :
