बांधकाम साहित्य चोरी करणाऱ्या दोन महिलांना अटक ; ४० हजारांचा मुद्देमाल जप्त
रामानंद नगर पोलिसांची कारवाई
जळगाव | प्रतिनिधी महाबळ व आदर्श नगर परिसरातील बांधकाम साईटवरून साहित्य चोरी करणाऱ्या दोन महिलांना रामानंद पोलीस ठाण्याच्या पथकाने अटक केली असून त्यांच्या ताब्यातून ४० हजार रुपये किंमतीच्या २० सेंट्रींग प्लेटा हस्तगत करण्यात आल्या आहेत.
ठेकेदार किरण जगनाथ पवार यांच्या फिर्यादीनुसार, १० जून ते ४ जुलै दरम्यान त्यांच्या बांधकाम साईटवरून सेंट्रींग प्लेटा, लोखंडी जॅक व शिंकज्या असा एकूण १० हजार रुपये किंमतीचा माल चोरीला गेला होता. या प्रकरणी गुन्हा नोंदवून तपास सुरू असतानाच पोलीस निरीक्षक राजेंद्र गुंजाळ यांना गोपनीय माहिती मिळाली.
त्या आधारे गुन्हे शोधपथकाने तांबापुरातील संगीताबाई प्रभाकर चौधरी व हीराबाई दिलीप चव्हाण या दोन्ही महिलांना ताब्यात घेतले. चौकशीत त्यांनी रात्रीच्या वेळेस बांधकाम साईटवरून साहित्य चोरल्याची कबुली दिली. न्यायालयाने त्यांना ३ दिवसांची पोलीस कस्टडी सुनावली असून या कालावधीत पोलिसांनी त्यांच्या कडून ४० हजार रुपये किंमतीच्या २० सेंट्रींग प्लेटा जप्त करण्यात यश मिळवले.
ही कारवाई पोलीस अधीक्षक महेश्वर रेड्डी, अपर पोलीस अधीक्षक अशोक नखाते, उपविभागीय अधिकारी नितीन गणापुरे यांच्या मार्गदर्शनाखाली पोलीस निरीक्षक राजेंद्र गुंजाळ यांच्या नेतृत्वाखाली पार पडली. या पथकात उपनिरीक्षक सचिन रणशेवरे, सुधाकर अंभोरे, जितेंद्र राजपूत, सुशील चौधरी, जितेंद्र राठोड, विनोद सुर्यवंशी, योगेश बारी, हेमंत कळसकर, मनोज सुरवाडे, रेवानंद साळुंखे, गोविंदा पाटील व अतुल चौधरी यांनी कारवाई केले.
या प्रकरणाचा पुढील तपास पोलीस नाईक विनोद सुर्यवंशी करीत आहेत.
