अमृत योजना-2 मध्ये दिरंगाई; ठेकेदारावर कारवाईची मागणी
भुसावळ: शहरातील अमृत योजना टप्पा-2 अंतर्गत दिलेल्या कामाला ठेकेदाराने वेळेत सुरुवात केली नसल्याने संबंधित ठेकेदाराचे कंत्राट रद्द करून त्याच्यावर कठोर कारवाई करण्याची मागणी करण्यात आली आहे. सामाजिक कार्यकर्ते आणि माहिती अधिकार कार्यकर्ते केदारनाथ सानप यांनी भुसावळ नगरपालिका प्रशासक तथा प्रांताधिकारी जितेंद्र पाटील यांना याबाबत निवेदन दिले आहे.
निवेदनात नमूद केल्यानुसार, अमृत योजना टप्पा-2 साठी १५ ऑक्टोबर २०२४ रोजी संबंधित ठेकेदाराला कार्यारंभ आदेश देण्यात आला. मात्र, पाच महिने उलटूनही कोणतेही काम सुरू झालेले नाही. त्यामुळे ठेकेदाराची चौकशी करून त्याचे कंत्राट रद्द करावे आणि त्याला काळ्या यादीत टाकावे, अशी मागणी सानप यांनी केली आहे.
भुसावळ नगरपालिकेने या मागणीची दखल घेतली असून, लवकरच संबंधित ठेकेदारावर योग्य ती कारवाई केली जाईल, अशी शक्यता आहे. नागरिकांमध्ये देखील या प्रकल्पाच्या दिरंगाईबद्दल नाराजी वाढली आहे, त्यामुळे प्रशासन ठेकेदाराला कठोर इशारा देण्याच्या तयारीत आहे.
