एसटी महामंडळात लवकरच १७,४५० नवीन चालक-सहायकांची भरती
मुंबई प्रतिनिधी: प्रवाशांना अखंडित व दर्जेदार सेवा देण्यासाठी महाराष्ट्र राज्य मार्ग परिवहन महामंडळाने (MSRTC) एक महत्त्वाचा निर्णय घेतला आहे. महामंडळात लवकरच दाखल होणाऱ्या ८ हजार नवीन बसेससाठी आवश्यक मनुष्यबळाची गरज लक्षात घेऊन तब्बल १७,४५० चालक आणि सहायकांची कंत्राटी पद्धतीने भरती करण्यात येणार आहे.
या भरतीमुळे राज्यातील हजारो तरुण-तरुणींना रोजगाराची संधी मिळणार आहे. एसटी महामंडळाचे अध्यक्ष तथा परिवहन मंत्री प्रताप सरनाईक यांनी ही माहिती दिली. निवडलेल्या उमेदवारांना किमान ३०,००० रुपये मासिक वेतन मिळेल. तसेच, एसटीकडून आवश्यक प्रशिक्षणाचीही सोय करण्यात येणार आहे.
एसटी महामंडळाच्या ३०० व्या संचालक मंडळाच्या बैठकीत हा महत्त्वपूर्ण निर्णय घेण्यात आला. भरतीची ई-निविदा प्रक्रिया २ ऑक्टोबरपासून सुरू होईल. ही प्रक्रिया विभागनिहाय राबवली जाणार असून, संबंधित संस्थांकडून आवश्यक मनुष्यबळ तीन वर्षांच्या कालावधीसाठी उपलब्ध करून दिले जाईल.
