जळगाव : देवांश भावसार (वय २० महिने) या चिमुकल्याच्या उपचारासाठी जळगावकरांनी एकत्र येऊन मदत फेरीचे आयोजन केले. स्वातंत्र्यदिनानिमित्त हा मानवतेचा जागर करत ही फेरी जळगाव महापालिका कार्यालयातून काढून कलेक्टर कार्यालयापर्यंत नेण्यात आली.
देवांशला स्पायनल मस्क्युलर अट्रॉफी (SMA) टाइप-२ हा दुर्मिळ आजार झाला आहे. या आजारामुळे लहान मुलांचे स्नायू कमकुवत होत जातात आणि हळूहळू चालणे, खाणे, अगदी श्वास घेण्याची क्षमता देखील कमी होते. या आजारावर उपलब्ध असलेला एकमेव उपचार म्हणजे झोल्गेन्समा ही जीन थेरपी असून, तिचा खर्च साधारण १६ कोटी रुपये आहे. हा उपचार बालक दोन वर्षांचे होण्याआधी करणे अत्यावश्यक आहे.
मध्यमवर्गीय कुटुंबासाठी इतका प्रचंड खर्च परवडणारा नाही. त्यामुळे भावसार कुटुंबाच्या मदतीसाठी जळगावकरांनी पुढाकार घेतला. समाजात जागरूकता निर्माण करून आणि देणगी गोळा करण्याच्या उद्देशाने मदत फेरीचे आयोजन करण्यात आले. या फेरीत सुमारे १५० नागरिक सहभागी झाले.
या प्रसंगी पालकमंत्री श्री. गुलाबराव पाटील, महापालिका आयुक्त श्री. ज्ञानेश्वर धेरे, खासदार सौ. स्मिताताई वाघ, आमदार श्री. राजू मामा भोळे आदी मान्यवरांची भेट घेऊन मदतीची विनंती करण्यात आली. मान्यवरांनी आपल्या परीने सहकार्य करण्याचे आश्वासन दिले. अनेक नागरिकांनीही आपल्या क्षमतेनुसार आर्थिक मदत करून पाठबळ दिले.
मदत फेरीत भावसार समाजाध्यक्ष जळगाव श्री. शैलेंद्र पांडे, श्री. अशोक भावसार, श्री. जयेश भावसार, सौ. दिपाली भावसार, श्री. प्रितेश भावसार, श्री. सुमित भावसार, श्री. गोपाल भावसार, श्री. शेखर भावसार, जैन उद्योग समूहाचे सहकारी श्री. तळेले, श्री. वरंकर, श्री. खान, श्री. सतीश अंबेकर, जनता बँक सहकारी श्री. बरूडवाले, मित्र परिवार व समाजबंधू आदींचा सहभाग आणि सहकार्य लाभले.
