महा पोलीस न्यूज । ३ सप्टेंबर २०२५ । समाजसेवा, शिक्षण क्षेत्र आणि वैद्यकीय क्षेत्रातील योगदानासाठी ओळखल्या जाणाऱ्या गोदावरी फाउंडेशनचे संस्थापक अध्यक्ष तथा माजी खासदार डॉ. उल्हास पाटील, सुभाष पाटील व प्रमिला पाटील यांच्या मातोश्री श्रीमती गोदावरी आई पाटील यांचे आज दुपारी १.३४ वाजता दुःखद निधन झाले.
गोदावरी आईंच्या मार्गदर्शनाने व संस्कारांनी पाटील कुटुंबाला आणि गोदावरी फाउंडेशनला उभारी मिळाली. त्यांचा शांत, संयमी व प्रेमळ स्वभाव समाजासाठी प्रेरणादायी ठरला होता. त्यांच्या निधनाने कुटुंबीय, नातेवाईक आणि शैक्षणिक क्षेत्रात हळहळ व्यक्त होत आहे.
गोदावरी आईंचे पार्थिव अंतिम दर्शनासाठी आज रात्रीपासून उद्या सकाळपर्यंत गोदावरी हॉस्पिटल, भास्कर मार्केट, जळगाव येथे ठेवण्यात येणार आहे. अंतिम संस्कार उद्या सकाळी ११ वाजता डॉ. उल्हास पाटील मेडिकल कॉलेज, जळगाव येथे होणार आहेत.
त्यांच्या निधनाने पाटील परिवारासह संपूर्ण जिल्हा दुःखसागरात बुडाला आहे. समाजसेवा व शिक्षण क्षेत्रातील त्यांचे अप्रत्यक्ष योगदान दीर्घकाळ स्मरणात राहील.
