पारोळ्यात बनावट देशी दारूचा कारखाना उध्वस्त, ४० लाखांचा मुद्देमाल जप्त
पारोळा पोलिसांची मोठी कारवाई
पारोळा: पारोळा तालुक्यात अवैध पद्धतीने सुरू असलेल्या बनावट देशी दारूच्या कारखान्यावर पोलिसांनी मोठी कारवाई केली आहे. या कारवाईत पोलिसांनी तब्बल ४० लाख ३३ हजार रुपये किमतीचा मुद्देमाल जप्त केला असून, परिसरात एकच खळबळ उडाली आहे.
पोलीस निरीक्षक सचिन सानप यांना बहादरपूर गावाजवळील बोरी नदीच्या किनाऱ्यावर एका लोखंडी पत्र्याच्या शेडमध्ये ‘टँगो पंच’ नावाचा बनावट देशी दारूचा कारखाना सुरू असल्याची गोपनीय माहिती मिळाली. पोलीस अधीक्षक डॉ. महेश्वर रेड्डी यांच्या मार्गदर्शनाखाली आणि अपर पोलीस अधीक्षक कविता नेरकर-पवार यांच्या सूचनेनुसार, उपविभागीय पोलीस अधिकारी विनायक कोते यांच्या नेतृत्वाखाली पोलिसांनी हा छापा टाकला.
४० लाखाहून अधिक किमतीचा मुद्देमाल जप्त
पोलिस पथकाने दोन शासकीय पंचांच्या उपस्थितीत या अवैध कारखान्यावर छापा टाकला. या ठिकाणाहून पोलिसांनी मोठ्या प्रमाणावर तयार दारू, कच्चा माल, यंत्रसामग्री, वाहने आणि इतर साहित्य जप्त केले.३,१०० सीलबंद दारूच्या बाटल्या (₹१.२४ लाख),७०० विक्रीपूर्व अवस्थेतील बाटल्या (₹२८,०००),८०० लीटर स्पिरीट (₹३.५५ लाख) ,१,५०० लीटर तयार दारू (₹३ लाख), आर.ओ., सी.एन.सी. आणि इतर मशीनरी (₹१० लाख) ,३० हजार टँगो पंच बुच , ६१,२०० रिकाम्या बाटल्या (₹६.१२ लाख) , बोलेरो मालवाहू वाहन आणि स्विफ्ट डिझायर कार (₹१० लाख) , लोखंडी पत्र्याचे शेड (₹५ लाख) असा एकूण ४० लाख ३३ हजार रुपये किमतीचा मुद्देमाल पोलिसांनी हस्तगत केला आहे.
ही कारवाई पोलीस निरीक्षक सचिन सानप, उपनिरीक्षक अमोल दुकळे यांच्यासह पोलीस हवालदार महेश पाटील, शरद पाटील, प्रवीण पाटील, अनिल राठोड, अजय बाविस्कर, आकाश माळी, विजय पाटील, शेखर साळुंखे आणि चालक पोह. संजय पाटील व वेलचंद पवार यांच्या संयुक्त पथकाने केली. या कारवाईमुळे अवैध दारू निर्मिती करणाऱ्या टोळ्यांना मोठा दणका बसला आहे.
