माणुसकीचे दर्शन: बेघर कुटुंबांच्या डोक्यावर अल खिदमत ट्रस्टकडून प्लास्टिकचे छत; अमळनेरातील उपक्रमाचे कौतुक
माणुसकीचे दर्शन: बेघर कुटुंबांच्या डोक्यावर अल खिदमत ट्रस्टकडून प्लास्टिकचे छत; अमळनेरातील उपक्रमाचे कौतुक
अमळनेर:(पंकज शेटे)
गांधीनगर इस्लामपुरा परिसरात झालेल्या अतिक्रमण निर्मूलन मोहिमेदरम्यान घरे पाडण्यात आलेल्या कुटुंबांपैकी दोन कुटुंबे अद्यापही उघड्या आकाशाखाली जीवन कंठत आहेत. कडक उन्हाचे चटके आणि आगामी पावसाळ्याचे संकट अशा दुहेरी कात्रीत अडकलेल्या या कुटुंबांच्या मदतीसाठी स्थानिक ‘अल खिदमत ट्रस्ट’ने पुढाकार घेतला आहे. ट्रस्टच्या वतीने या कुटुंबांना तात्पुरता निवारा म्हणून प्लास्टिकचे छत (आश्रय व्यवस्था) उभारून देण्यात आले आहे.
अतिक्रमण कारवाईत घर गमावल्यानंतर या दोन कुटुंबांचे दैनंदिन जीवन अत्यंत हलाखीचे झाले होते. निसर्गाच्या लहरीपणाचा सामना करत उघड्यावर जगणाऱ्या या कुटुंबांची व्यथा ओळखून अल खिदमत ट्रस्ट, अमळनेर यांनी सामाजिक बांधिलकी जपली. उन्हाळा आणि संभाव्य पावसाळ्यापासून या कुटुंबांचे रक्षण व्हावे, यासाठी त्यांच्या राहत्या ठिकाणी प्लास्टिकचे छत तयार करून देण्यात आले.
नागरिकांकडून कौतुक:
अल खिदमत ट्रस्टने ऐन संकटसमयी दाखवलेल्या या तत्परतेमुळे पीडित कुटुंबांना मोठा दिलासा मिळाला आहे. कठीण परिस्थितीत मदतीचा हात पुढे करत ट्रस्टने माणुसकीचे उत्तम उदाहरण समाजासमोर ठेवले आहे, अशा भावना परिसरातील नागरिकांकडून व्यक्त होत असून या उपक्रमाचे सर्वत्र कौतुक केले जात आहे.
