जिल्हा परिषदेच्या मुख्य कार्यकारी अधिकारी पदाचा मीनल करणवाल यांनी स्वीकारला पदभार
जळगाव, प्रतिनिधी– जिल्हा परिषदेच्या मुख्य कार्यकारी अधिकारीपदी श्रीमती मीनल करणवाल यांनी पदभार स्वीकारला आहे. यापूर्वी त्या नांदेड जिल्हा परिषदेच्या मुख्य कार्यकारी अधिकारी पदावर कार्यरत होत्या. त्यांची नियुक्ती श्री. अंकित यांच्या जागी करण्यात आली आहे, ज्यांची बदली छत्रपती संभाजीनगर येथे झाली आहे.
गुरुवारी (दि. 20 मार्च) प्रभारी मुख्य कार्यकारी अधिकारी रणधीर सोमवंशी यांच्याकडून त्यांनी पदभार स्वीकारला. या वेळी जिल्हा परिषदेचे उपमुख्य कार्यकारी अधिकारी स्नेहा पवार, जिल्हा ग्रामीण विकास यंत्रणेचे प्रकल्प संचालक आर. डी. लोखंडे तसेच सर्व विभागप्रमुख उपस्थित होते.
पदभार स्वीकारल्यानंतर श्रीमती करणवाल यांनी जिल्ह्यातील विविध योजनांचा आढावा घेतला आणि विभागप्रमुखांशी संवाद साधला. त्यांनी शिक्षण, आरोग्य, स्वच्छता आणि जल जीवन मिशन यांसारख्या महत्त्वपूर्ण योजनांवर विशेष लक्ष केंद्रित करण्याचा निर्धार व्यक्त केला. तसेच जिल्हा परिषदेच्या विविध विभागांना भेट देऊन कार्यपद्धतीची पाहणी केली.
नवीन मुख्य कार्यकारी अधिकारी म्हणून कार्यभार स्वीकारल्यानंतर श्रीमती करणवाल यांच्या नियुक्तीमुळे जिल्ह्यातील प्रशासन अधिक प्रभावीपणे राबवले जाईल, अशी अपेक्षा व्यक्त करण्यात येत आहे.
