गहाळ बिंदुनामावली फाईल अखेर नाशिक विभागीय आयुक्त कार्यालयात सापडली
जळगाव : महापालिकेतील २१०० पदांच्या भरतीसाठी आवश्यक असलेली गहाळ बिंदुनामावली फाईल अखेर नाशिक विभागीय आयुक्त कार्यालयात सापडली आहे. महापालिकेच्या उपायुक्तांनी पुरावा सादर केल्यानंतर शोधाशोध सुरू झाली आणि फाईल मिळून आली. या प्रकारामुळे विभागीय कार्यालयाचा भोंगळ कारभार उघड झाला असून, भरती प्रक्रियेत झालेला अडथळा आता दूर होण्याची शक्यता आहे.
२५ जुलै २०२५ रोजी महापालिकेने बिंदुनामावली तपासणीसाठी प्रस्ताव नाशिक विभागीय आयुक्तांकडे पाठविला होता. मात्र १८ ऑगस्ट रोजी सहायक आयुक्त कुंदन हिरे यांनी जळगाव महापालिकेला पत्र लिहून, प्रस्ताव प्राप्त झालेला नसल्याचे सांगत जबाबदार अधिकाऱ्यांना तातडीने नाशिकला येण्याचे आदेश दिले.
यानंतर उपायुक्त धनश्री शिंदे व आस्थापना अधीक्षक लक्ष्मण सपकाळे सुधारित प्रस्ताव घेऊन नाशिकला गेले. त्यांनी प्रस्ताव पाठविल्याचा पुरावा सादर केला असता, शोधाशोध सुरू झाली आणि संबंधित कर्मचाऱ्याची बदली झाल्याने फाईल मिळून येत नसल्याचे प्रथम स्पष्ट झाले. अखेरीस ती फाईल सापडली.
या गोंधळामुळे महापालिकेला मनस्ताप सहन करावा लागला. मात्र आता सुधारित प्रस्ताव विभागीय कार्यालयाकडे दाखल झाल्याने भरती प्रक्रियेला गती मिळेल, अशी अपेक्षा आहे. विशेष म्हणजे, महापालिका निवडणुकीपूर्वी हा प्रश्न मार्गी लागेल अशी आशा व्यक्त केली जात आहे.
