महा पोलीस न्यूज । चेतन वाणी । महाराष्ट्र शासनाने राबविलेल्या १०० दिवस धोरणात्मक बाबींचा कार्यक्रम अंतर्गत जळगाव जिल्ह्याने उत्कृष्ट कामगिरी करत राज्यात आपले नावलौकिक मिळवले आहे. या कार्यक्रमात जळगाव जिल्हाधिकारी कार्यालयाने सर्वोत्तम जिल्हाधिकारी म्हणून आणि जळगाव पोलीस अधीक्षक कार्यालयाने सर्वोत्तम पोलीस अधीक्षक म्हणून राज्यात तृतीय क्रमांक पटकावला आहे. ही उल्लेखनीय यशोगाथा जिल्हा प्रशासन आणि पोलीस दलाच्या समर्पित प्रयत्नांचा परिपाक आहे.
१०० दिवस धोरणात्मक बाबींच्या कार्यक्रमाची एक झलक
महाराष्ट्र शासनाने नागरिकांना पारदर्शक, गतिमान आणि कार्यक्षम सेवा प्रदान करण्याच्या उद्देशाने १०० दिवस कृती आराखडा हा महत्त्वाकांक्षी उपक्रम हाती घेतला. या कार्यक्रमांतर्गत विविध विभागांनी आपल्या कार्यक्षमतेत सुधारणा करणे, नागरिकांच्या तक्रारींचे त्वरित निराकरण करणे, डिजिटल सेवांचा विस्तार करणे, पायाभूत सुविधांचा विकास करणे आणि सुशासन (Good Governance) राबवणे यावर भर दिला.जळगाव जिल्ह्याने या कृती आराखड्याची प्रभावी अंमलबजावणी करत अनेक क्षेत्रांत उल्लेखनीय प्रगती साधली. यामुळे जिल्हा प्रशासन आणि पोलीस दल यांना राज्यस्तरीय पुरस्काराने सन्मानित करण्यात आले.
जळगाव जिल्हाधिकारी कार्यालय : प्रशासकीय उत्कृष्टतेचा आदर्श
जळगाव जिल्हाधिकारी कार्यालयाने सर्वोत्तम जिल्हाधिकारी म्हणून तृतीय क्रमांक मिळवला. जिल्हाधिकारी आयुष प्रसाद यांच्या नेतृत्वाखाली प्रशासनाने नागरिककेंद्रित उपक्रमांना प्राधान्य दिले. या कृती आराखड्यांतर्गत खालील प्रमुख बाबींवर काम करण्यात आले:
डिजिटल सेवा आणि संकेतस्थळ अद्ययावतीकरण : जिल्हा प्रशासनाने संकेतस्थळावरील माहिती अद्ययावत करून नागरिकांना नवीनतम माहिती उपलब्ध करून दिली.
ईज ऑफ लिव्हिंग : नागरिकांच्या जीवन सुलभतेवर लक्ष केंद्रित करत विविध योजनांची प्रभावी अंमलबजावणी.
व्हॉट्सॲप चॅटबोट : नागरिकांच्या तक्रारी आणि प्रश्न सोडवण्यासाठी तंत्रज्ञानाचा वापर.
पायाभूत सुविधांचा विकास : जिल्ह्यातील रस्ते, पूल आणि इतर प्रकल्पांना गती देणे.
नागरिकांच्या तक्रारींचे निराकरण : लोकशाही दिन, सेतु सुविधा केंद्र आणि आपत्ती व्यवस्थापन यंत्रणेद्वारे त्वरित सेवा.
जिल्हाधिकारी कार्यालयाने महा योजना ऑनलाइन पोर्टलद्वारे नागरिकांना विविध शासकीय योजनांची माहिती आणि अर्ज प्रक्रिया सुलभ केली. यामुळे नागरिकांना योजनांचा लाभ घेण्यासाठी आवश्यक माहिती एकाच ठिकाणी उपलब्ध झाली.
जळगाव पोलीस अधीक्षक : सुशासन आणि सुरक्षेचा दृढनिश्चय
जळगाव पोलीस अधीक्षक कार्यालयाने सर्वोत्तम पोलीस अधीक्षक म्हणून तृतीय क्रमांक मिळवला. पोलीस अधीक्षक डॉ. महेश्वर रेड्डी यांच्या नेतृत्वाखाली पोलीस दलाने कायदा व सुव्यवस्था राखण्याबरोबरच नागरिकांना त्वरित आणि पारदर्शक सेवा प्रदान केल्या. या कृती आराखड्यांतर्गत पोलीस दलाने खालील बाबींवर विशेष लक्ष दिले.
नागरिक केंद्रित सेवा : पोलीस स्टेशनस्तरावर सर्व तक्रारींचे त्वरित निराकरण केले आणि पारदर्शक प्रक्रिया राबवली.
तंत्रज्ञानाचा वापर : डिजिटल माध्यमांद्वारे गुन्हेगारी नियंत्रण आणि नागरिकांशी संवाद.
समुदाय सहभाग : नागरिकांमध्ये जागरूकता निर्माण करणे आणि पोलीस-जनता संबंध दृढ करणे.
गुन्हेगारी नियंत्रण : अनधिकृत शस्त्रे, अमली पदार्थ आणि सायबर गुन्ह्यांविरुद्ध कठोर कारवाई.
या उपक्रमांतर्गत उत्कृष्ट कामगिरी करणाऱ्या पोलीस अधिकारी आणि कर्मचाऱ्यांचा प्रशस्तीपत्र आणि पुष्पगुच्छ देऊन सत्कार करण्यात आला, ज्यामुळे त्यांचे मनोबल उंचावले.
पालकसचिवांचा आढावा आणि शासनाचा पाठिंबा
राज्याच्या अपर मुख्य सचिव यांनी वेळोवेळी व्हिडिओ कॉन्फरन्सिंगद्वारे जिल्हा प्रशासनाचा आढावा घेतला. यावेळी त्यांनी जळगाव जिल्ह्याच्या प्रगतीचे कौतुक करत पुढील १०० दिवसांत आणखी चांगली कामगिरी करण्याची अपेक्षा व्यक्त केली. शासनस्तरावर या कृती आराखड्याचा नियमित आढावा घेतला जाणार आहे. गेल्या आठवड्यातच जळगाव जिल्हाधिकारी कार्यालय आणि पोलीस अधीक्षक कार्यालयात समितीने भेट देऊन पाहणी केली होती.
क्यूआर कोड प्रणाली आणि सुशोभीकरण ठरले कौतुकास्पद
जळगाव पोलीस अधीक्षक कार्यालयाचे नुकतेच सुशोभीकरण करण्यात आले. तसेच सर्व पोलीस ठाण्यात देखील साफसफाई करून भंगार आणि जुन्या दुचाकींची विल्हेवाट लावण्यात आली. जळगाव जिल्हाधिकारी कार्यालय आणि पोलीस अधीक्षक कार्यालयामार्फत नागरिकांना तक्रार करण्यासाठी क्यूआर कोड प्रणाली सुरु केली. शासकीय संकेतस्थळासह जिल्ह्यात तो क्यूआर कोड चिकटवण्यात आला. नागरिकांना तक्रारीसाठी शासकीय कार्यालयात जाण्याची आवश्यकता नसल्याने त्यांचा वेळ आणि पैसे दोघांची बचत होऊ लागली.
