पोलीस कर्मचारी पतपेढीचा २ कोटी २ लाखांचा नफा; १०५ वर्षांची गौरवशाली वाटचाल
सभासदांच्या पाल्यांच्या शिक्षणासह वाहनांसाठी ९ टक्के व्याजदराने कर्ज सुविधा; विविध क्षेत्रांत प्रगती करणाऱ्या पाल्यांचा सत्कार
जळगाव, प्रतिनिधी : जळगाव जिल्हा पोलीस कर्मचारी सहकारी पतपेढी लि., जळगाव या संस्थेची वार्षिक सर्वसाधारण सभा नुकतीच उत्साहपूर्ण वातावरणात पार पडली. यावेळी संस्थेच्या आर्थिक प्रगतीचा आढावा घेण्यात आला. तसेच विविध क्षेत्रांत उल्लेखनीय प्रगती करणाऱ्या पोलीस कर्मचाऱ्यांच्या पाल्यांचा सत्कार करण्यात आला.
जळगाव जिल्हा पोलीस कर्मचारी सहकारी पतपेढीची स्थापना २९ ऑगस्ट १९२१ रोजी झाली. संस्थेने नुकतीच १०५ वर्षांची गौरवशाली वाटचाल पूर्ण करून १०६व्या वर्षात पदार्पण केले आहे. दीर्घ परंपरा आणि सभासदांच्या विश्वासाच्या बळावर संस्थेने आर्थिक प्रगतीची घोडदौड कायम ठेवली आहे.
संस्थेला २ कोटी २ लाखांचा नफा
सन २०२५-२६ या आर्थिक वर्षात संस्थेने तब्बल २ कोटी २ लाख रुपयांचा नफा मिळविला आहे. ही संस्थेसाठी निश्चितच अभिमानाची बाब आहे. संस्थेचा मुख्य उद्देश केवळ नफा मिळविणे नसून सभासदांच्या आर्थिक गरजा पूर्ण करणे तसेच त्यांच्या कुटुंबाच्या प्रगतीला हातभार लावणे हा आहे.
सभासदांना ७१ कोटींचे जामीन कर्ज
सभासदांना आतापर्यंत तब्बल ७१ कोटी रुपयांचे जामीन कर्ज वितरित करण्यात आले आहे. त्याचप्रमाणे सभासदांच्या पाल्यांना उच्च शिक्षणासाठी ९ टक्के व्याजदराने शैक्षणिक कर्जाची सुविधा उपलब्ध करून देण्यात आली आहे. या माध्यमातून आतापर्यंत सुमारे ८८ लाख रुपयांचे कर्ज वाटप करण्यात आले आहे.
वाहन कर्जाचीही सुविधा
सभासदांसाठी मोटारसायकल तसेच वाहन खरेदीसाठी ९ टक्के व्याजदराने वाहन कर्जाची सुविधा उपलब्ध करून देण्यात आली आहे. या योजनेअंतर्गत आतापर्यंत सुमारे ८७ लाख रुपयांचे कर्ज वितरित करण्यात आले आहे.
संस्थेची ही आकडेवारी केवळ आर्थिक व्यवहार दर्शविणारी नसून, सभासदांच्या स्वप्नांना बळ देणारी आहे. त्यांच्या मुलांच्या उच्च शिक्षणाला आर्थिक आधार देण्याबरोबरच गरजेच्या वेळी सभासदांच्या कुटुंबाला आर्थिक मदतीचा हात देण्याचे काम पतपेढीने केले आहे.
सभासदांच्या कुटुंबासाठीही आर्थिक आधार
सभासदांच्या पश्चात त्यांच्या कुटुंबालाही आर्थिक आधार मिळावा, यासाठी संस्थेने महत्त्वपूर्ण निर्णय घेतले आहेत. सभासदांचा तीन वर्षांच्या कालावधीसाठी ५ लाख रुपयांचा अपघाती विमा काढण्यात आला आहे. तसेच सभासदाचा दुर्दैवी मृत्यू झाल्यास तात्काळ मदत म्हणून १० हजार रुपयांचा मृत्यू निधी देण्याची तरतूद करण्यात आली आहे.
या विविध योजनांमुळे पोलीस कर्मचारी आणि त्यांच्या कुटुंबीयांना आर्थिक स्थैर्य मिळण्यास मदत होत असून, सभासदांच्या कल्याणाला केंद्रस्थानी ठेवून पतपेढीची वाटचाल सुरू आहे.
