पुण्यात नाट्यगृहात प्रेक्षक महिलेच्या साडीमध्ये उंदीर घुसल्यामुळे गोंधळ
पुणे | प्रतिनिधी
शहरातील प्रसिद्ध यशवंतराव चव्हाण नाट्यगृहात रविवारी संध्याकाळी रंगलेल्या ‘गंधर्व’ या नाटकाच्या प्रयोगादरम्यान एका उंदराने थेट एका महिला प्रेक्षकाच्या साडीखाली प्रवेश केल्याने क्षणभरासाठी प्रेक्षागृहात गोंधळाचे वातावरण निर्माण झाले.
घटनेच्या वेळी सभागृहात सुमारे ८०० हून अधिक प्रेक्षक उपस्थित होते. अचानक झालेल्या किंचाळीने सगळ्यांचं लक्ष त्या दिशेने वळलं. सुरक्षारक्षक आणि स्टाफच्या मदतीने संबंधित महिलेला बाहेर नेण्यात आलं. या अनपेक्षित घटनेमुळे काही क्षणांसाठी प्रयोग थांबवावा लागला. उंदीर साडीमध्ये शिरल्याची माहिती मिळताच अनेक प्रेक्षक चकित झाले, तर काहीजण नाराजीने सभागृहाबाहेर गेले.
या प्रकरणावर प्रतिक्रिया देताना नाट्यगृह प्रशासनाने सांगितले, “आम्ही नियमित स्वच्छता आणि देखभाल करत असतो. ही घटना अत्यंत दुर्दैवी आहे. सखोल चौकशी करून योग्य ती उपाययोजना केली जाईल.”
पुणे हे सांस्कृतिक वैभवाने समृद्ध शहर असून यशवंतराव चव्हाण नाट्यगृह हे नामवंत कलाकारांच्या प्रयोगांसाठी एक प्रमुख व्यासपीठ आहे. अशा ठिकाणी उंदराचा वावर हा केवळ गैरसोयीचा विषय नाही, तर प्रेक्षकांच्या सुरक्षिततेबाबतही गंभीर प्रश्न निर्माण करणारा प्रकार आहे.
