महा पोलीस न्यूज । चेतन वाणी । जळगाव जिल्हा पोलीस अधीक्षक कार्यालयात आज सोशल मीडियावर रील्सच्या माध्यमातून मोठ्या प्रमाणावर प्रभाव निर्माण करणाऱ्या रिल्स क्रिएटर्सची विशेष बैठक आयोजित करण्यात आली होती. समाजामध्ये कायद्यांविषयी जागरूकता निर्माण व्हावी आणि नागरिकांनी गुन्हेगारीपासून सतर्क राहावे, या उद्देशाने ही बैठक घेण्यात आली.
बैठकीदरम्यान पोलीस अधीक्षक श्रीकांत धिवरे यांनी उपस्थित रिल्स स्टारशी संवाद साधत समाजोपयोगी विषयांवर प्रभावी रील्स तयार करण्याचे आवाहन केले. विशेषतः तरुण वर्ग सोशल मीडियाशी मोठ्या प्रमाणावर जोडला गेल्याने योग्य संदेश देण्यासाठी रील्स हे प्रभावी माध्यम ठरू शकते, असे त्यांनी सांगितले.
यावेळी फेटल अपघात व वाहतूक नियमांचे पालन, पॉस्को कायद्याबाबत माहिती, सायबर गुन्ह्यांपासून बचाव, महिलांविषयक गुन्हे व कायदेशीर संरक्षण या महत्त्वाच्या विषयांवर जनजागृतीपर रील्स तयार करण्याच्या सूचना करण्यात आल्या.
बैठकीस जळगाव जिल्ह्यातील अनेक प्रसिद्ध रिल्स क्रिएटर्स उपस्थित होते. त्यामध्ये अमित माळी, संघपाल तायडे, सुरेश राजपूत, समृद्धी पाटील, तन्वी पांडव, भाग्यश्री पाटील, याशिका किनाडा, तेजस्विनी देशमुख, अक्षय नेहते, पवन भोई, आदित्य संभाजी पाटील, ऋषिकेश पवार, हरीदास बोंडे, अजय कुमावत, महेश सुर्वे, निवृत्ती इंगळे आदींचा समावेश होता.
पोलीस प्रशासन आणि सोशल मीडिया इन्फ्लुएन्सर्स यांनी एकत्र येऊन समाजहितासाठी काम करण्याचा हा उपक्रम कौतुकास्पद असल्याची भावना यावेळी व्यक्त करण्यात आली. समाजामध्ये सकारात्मक संदेश पोहोचवून गुन्हेगारी रोखण्यासाठी प्रत्येकाने आपली सामाजिक जबाबदारी पार पाडावी, असे आवाहनही पोलीस अधीक्षक श्रीकांत धिवरे यांनी केले.
