जामनेरमध्ये सहाय्यक महसूल अधिकाऱ्यावर २१ लाख ६३ हजार २८५ रुपयांच्या फसवणुकीचा गुन्हा

जळगाव (प्रतिनिधी) – जामनेर येथील महसूल विभागात मोठा आर्थिक घोटाळा उघडकीस आला आहे. तहसीलदारांच्या बनावट स्वाक्षरीचा वापर करून शासकीय दस्तऐवज तयार करून शासनाची तब्बल २१ लाख ६३ हजार २८५ रुपयांची फसवणूक सहाय्यक महसूल अधिकारी हर्षल विश्वनाथ पाटील यांनी केल्याचे समोर आले आहे. या गंभीर प्रकरणी तहसीलदार नानासाहेब आगळे यांच्या तक्रारीवरून जामनेर पोलिस ठाण्यात शनिवारी (दि. १३) फसवणुकीचा गुन्हा दाखल करण्यात आला.

तहसीलदारांच्या बनावट स्वाक्षरीने आदेश व दस्तऐवज तयार करून ते खरे असल्याचे भासवत शासकीय तलाठी व मंडळ अधिकारी यांच्या माध्यमातून अर्जदारांकडे सादर करण्यात आले होते. या बनावट प्रक्रियेतून शासनाचा महसूल बुडवून स्वतःचा लाभ घेण्यात आल्याचा आरोप पाटील यांच्यावर आहे.

यासंदर्भात हर्षल पाटील यांनी कबुली देत तहसीलदारांना मोबाईलवर संदेश पाठवून, शासनाची फसवणूक झाल्याचे मान्य केले असून, “सदर रक्कम शासनाकडे भरण्यास तयार आहे, माझ्या कुटुंबाचा व मुलांच्या भविष्याचा विचार करून मला चूक सुधारण्याची संधी द्यावी” असे सहानुभूतीपूर्वक विनवणी केली आहे.

या प्रकरणाचा तपास पोलीस उपनिरीक्षक सचिन शिंदे करीत असून, शासनाचा मोठा महसूल बुडविल्यामुळे हर्षल पाटील यांच्यावर निलंबनाची कारवाई करण्याचा प्रस्ताव तहसीलदारांकडून जिल्हाधिकाऱ्यांकडे पाठविण्यात आला आहे.