ज्ञानदानाच्या कार्याला देहदानाची मौलिक जोड – डॉ. उल्हास पाटील
देहदान केेलेल्या व्यक्तींच्या कुटूंबातील सदस्यांप्रती कृतज्ञता
जळगाव :- देहदान करणारे व्यक्ती आणि त्यांचे कुटूंब हे समाजाचे खरे दूत आहेत. भावी डॉक्टर घडविण्यात देहदानाची भूमिका अत्यंत मोलाची आहे. ज्ञानदानाच्या या कार्याला देहदानाची ही मौलिक जोड असल्याचे प्रतिपादन गोदावरी फाउंडेशनचे अध्यक्ष डॉ. उल्हास पाटील यांनी व्यक्त केले. दरम्यान यावेळी देहदान करणार्या व्यक्तींच्या कुटूंबाप्रती डॉ. उल्हास पाटील वैद्यकीयातर्फे कृतज्ञता व्यक्त करण्यात आली.
डॉ. उल्हास पाटील वैद्यकीय महाविद्यालयाच्या अॅनाटॉमी विभागातर्फे जागतिक शरीररचना शास्त्र दिनानिमीत्त देहदान करणार्या व्यक्तींच्या कुटूंबातील सदस्यांच्या सन्मान सोहळ्याचे आयोजन करण्यात आले होते. याप्रसंगी प्रमुख पाहुणे म्हणून ते बोलत होते. यावेळी व्यासपीठावर वैद्यकीय महाविद्यालयाचे अधीष्ठाता डॉ. प्रशांत सोळंके, डीएम कार्डीओलॉजीस्ट डॉ. वैभव पाटील, रजीस्ट्रार प्रमोद भिरूड, होमीओपॅथी महाविद्यालयाचे प्राचार्य डॉ. राकेश मिश्रा, फिजीओथेरेपी महाविद्यालयाचे प्राचार्य डॉ. जयवंत नागुलकर, आयुर्वेद महाविद्यालयाचे डॉ. उमाकांत चौधरी, रूग्णालयाचे वैद्यकीय अधीक्षक डॉ. प्रेमचंद पंडीत, सीईओ डॉ. विजय बाविस्कर, अॅनाटॉमी विभागाच्या प्रमुख डॉ. शुभांगी वाघ हे उपस्थित होते. कार्यक्रमाच्या सुरूवातीला मान्यवरांच्या हस्ते सरस्वती पूजन आणि स्व. गोदावरी आजी यांच्या प्रतिमेला माल्यार्पण करण्यात आले. माजी खा. डॉ. उल्हास पाटील पुढे म्हणाले की, जन्म आणि मृत्यू हे अंतीम सत्य आहे. देहदान करणार्या आप्तेष्टांच्या माध्यमातून ज्ञानदानाचे उपकार होत आहेत. शरीररचना शास्त्र हा वैद्यकीय अभ्यासक्रमाचा पाया ्रआहे. हा पाया रचणार्या तुम्हा सर्वांच्या ऋणात आम्ही राहू इच्छितो असे त्यांनी सांगितले. तसेच डॉ. उल्हास पाटील वैद्यकीय महाविद्यालयात नेत्रदानासाठी प्रस्ताव दाखल करण्यात आल्याचेही त्यांनी सांगितले. देहदानाचे समाजदूत म्हणून तुमचे कार्य प्रेरणादायी असल्याचेही डॉ. उल्हास पाटील यांनी सांगितले. याप्रसंगी सुरेंद्र चौधरी, विनायक पाचपांडे, सुधाकर मोरे, चंद्रभागाताई यांनी मनोगत व्यक्त केले. कार्यक्रमाचे सूत्रसंचालन सुयश देशपांडे आणि पायल पाटील यांनी केले. तसेच यावेळी अॅनाटॉमी विभागातील देहदानाच्या प्रक्रियेत मोलाची भूमिका बजावणार्या स्टाफचाही सन्मान करण्यात आला.
सत्काराचा मान हेच आमचे भाग्य – डॉ. प्रशांत सोळंके
देहदान करणार्या व्यक्तींच्या कुटूंबातील सदस्यांचा सत्कार करण्याचा मान आम्हाला मिळाला हे आमचे भाग्यच असल्याचे मत अधीष्ठाता डॉ. प्रशांत सोळंके यांनी व्यक्त केले. तसेच देहदान हे प्रेरणादायी कार्य असून प्रत्येकाने देहदान करावे असे आवाहन त्यांनी केले.
३८ जणांचा झाला सन्मान
अॅनाटॉमी विभागातर्फे झालेल्या अत्यंत भावस्पर्शी कार्यक्रमात मान्यवरांच्या हस्ते देहदान करणार्या व्यक्तींच्या कुटूंबातील ३८ सदस्यांना स्मृतीचिन्ह देऊन कृतज्ञता व्यक्त करण्यात आली.
यांनी घेतले परिश्रम
यशस्वीतेसाठी वैष्णवी वानखेडे, पियुष कुकडे, शेख शहीद, रजस पाटील, रहीम कुरेशी, दिग्वीजय ठोंबरे, अर्चित व्यास, अॅनाटॉमी विभागाचे वंदना पाटील, जान्हवी भिरूड, गजानन जाधव, रोशन महाजन, गोपाल नांदुरकर, राजू धांडे यांनी परिश्रम घेतले
