भाजप–शिवसेना (शिंदे गट) युती जाहीर
राष्ट्रवादीशी चर्चेनंतर जागावाटप ठरणार
जळगाव : महानगरपालिका निवडणुकांचा बिगुल वाजताच उमेदवारी अर्ज भरण्याची प्रक्रिया सुरू झाली असून, त्याच पार्श्वभूमीवर महायुतीतील राजकीय हालचालींना वेग आला आहे. मनपा निवडणुकीसाठी भाजप आणि शिवसेना (शिंदे गट) यांनी युतीची अधिकृत घोषणा केली असून, राष्ट्रवादी काँग्रेस (अजित पवार गट) यांच्याशीही स्वतंत्र चर्चा करून त्यानंतर जागावाटपाचा अंतिम फॉर्म्युला निश्चित केला जाईल, अशी माहिती पालकमंत्री गुलाबराव पाटील यांनी दिली. या निर्णयामुळे महायुतीतील कार्यकर्त्यांमधील संभ्रम दूर झाला आहे.
जळगाव एमआयडीसी परिसरातील एका खासगी हॉटेलमध्ये बुधवारी पार पडलेल्या महत्त्वपूर्ण बैठकीत हा निर्णय घेण्यात आला. या बैठकीला पालकमंत्री गुलाबराव पाटील, आमदार राजूमामा भोळे, आमदार मंगेश चव्हाण, खासदार स्मिता वाघ, माजी महापौर नितीन लढा, शिवसेना शिंदे गटाचे जिल्हाध्यक्ष विष्णू भंगाळे, आमदार चंद्रकांत सोनवणे तसेच आमदार अमोल पाटील यांच्यासह दोन्ही पक्षांचे वरिष्ठ पदाधिकारी उपस्थित होते.
जळगाव शहराच्या सर्वांगीण विकासासाठी भाजप आणि शिवसेना एकत्रितपणे निवडणूक लढवणार असून, जागावाटप व सत्तास्थापनेचा प्राथमिक फॉर्म्युला ठरल्याचे यावेळी स्पष्ट करण्यात आले. मात्र महायुतीतील तिसरा घटक असलेल्या राष्ट्रवादी काँग्रेस (अजित पवार गट) यांच्याबाबतचा निर्णय अद्याप प्रलंबित असून, लवकरच स्वतंत्र बैठक घेऊन चर्चा केली जाणार आहे, असा विश्वास नेत्यांनी व्यक्त केला.
पॉप
राष्ट्रवादीशी चर्चा पूर्ण झाल्यानंतरच अंतिम जागावाटप जाहीर केले जाईल. भाजपकडून प्रभारी मंगेश चव्हाण, आमदार राजूमामा भोळे तर शिवसेनेकडून दोन पदाधिकारी हे राष्ट्रवादीशी बोलणी करणार असून, त्यानंतर एकत्रितपणे जागांची घोषणा केली जाईल, असे पालकमंत्री गुलाबराव पाटील यांनी स्पष्ट केले.
