चाळीसगाव येथे भाजपच्या माजी नगरसेवकावर अज्ञात हल्लेखोरांचा कोयत्याने प्राणघातक हल्ला
धुळे येथील खासगी रुग्णालयात उपचार सुरु
चाळीसगाव – शहरातील वैष्णवी साडी सेंटरजवळ मंगळवारी रात्री उशिरा घडलेल्या धक्कादायक घटनेत भाजपचे माजी नगरसेवक प्रभाकर चौधरी यांच्यावर अज्ञातांनी कोयत्याने जीवघेणा हल्ला केला. या हल्ल्यात ते गंभीर जखमी झाले असून त्यांच्यावर धुळे येथील खासगी रुग्णालयात उपचार सुरु आहेत. अचानक झालेल्या या हल्ल्यामुळे परिसरात एकच खळबळ उडाली.
मिळालेल्या माहितीनुसार, चौधरी यांना काही अज्ञात हल्लेखोरांनी अडवून वार केले. त्यामुळे त्यांना मोठ्या प्रमाणावर रक्तस्त्राव झाला. घटनेची माहिती मिळताच पोलिसांनी तातडीने घटनास्थळी धाव घेतली असून हल्लेखोरांचा शोध घेण्यासाठी विविध पथके रवाना करण्यात आली आहेत. या प्रकरणामागे राजकीय वैर की वैयक्तिक वाद, याचा तपास सुरू आहे.
प्रभाकर चौधरी हे भाजपचे सक्रिय कार्यकर्ते म्हणून ओळखले जातात. नुकतेच दोन दिवसांपूर्वी मंत्री गिरीश महाजन यांच्या हस्ते त्यांच्या कार्यालयाचे उद्घाटन झाले होते. त्यानंतरच झालेल्या या हल्ल्यामुळे राजकीय वर्तुळात चर्चेला ऊत आला आहे.
दरम्यान, या हल्ल्याचा भाजप पदाधिकारी व कार्यकर्त्यांनी तीव्र निषेध नोंदवला असून चाळीसगावातील कायदा व सुव्यवस्थेवर प्रश्नचिन्ह निर्माण झाल्याची भावना व्यक्त केली जात आहे.
