निर्माणाधीन तालुका आरोग्य अधिकारी कार्यालयाची पाहणी
मुख्य कार्यकारी अधिकारी करिश्मा नायर यांच्याकडून बांधकामाच्या दर्जाची तपासणी; आवश्यक सुविधांबाबत सूचना
एरंडोल, प्रतिनिधी : जिल्हा परिषदेच्या मुख्य कार्यकारी अधिकारी करिश्मा नायर यांनी मंगळवारी (६ ऑक्टोबर) एरंडोल येथे भेट देऊन निर्माणाधीन तालुका आरोग्य अधिकारी कार्यालयाच्या बांधकामाची पाहणी केली. यावेळी त्यांनी बांधकामाचा दर्जा, कामाची सद्यस्थिती तसेच कार्यालयात प्रस्तावित करण्यात आलेल्या विविध सोयी-सुविधांची माहिती घेतली.
पाहणीदरम्यान मुख्य कार्यकारी अधिकारी नायर यांनी बांधकामाची प्रत्यक्ष पाहणी करून निर्धारित निकषांनुसार कामाची गुणवत्ता राखण्याच्या सूचना संबंधितांना दिल्या. तसेच कार्यालयासाठी आवश्यक असलेल्या सुविधांचा योग्य पद्धतीने समावेश करण्याबाबतही त्यांनी मार्गदर्शन केले.
तालुका आरोग्य अधिकारी कार्यालय हे आरोग्य विभागाच्या प्रशासकीय कामकाजाच्या दृष्टीने महत्त्वाचे केंद्र असल्याने कार्यालयीन सुविधा, आवश्यक पायाभूत सोयी आणि कर्मचाऱ्यांसाठी उपयुक्त वातावरण निर्माण होईल, याकडे विशेष लक्ष देण्याच्या सूचना त्यांनी दिल्या.
बांधकामाचे नियोजन, गुणवत्ता आणि कामाची प्रगती यामध्ये कोणतीही तडजोड होऊ नये, तसेच प्रस्तावित सुविधांचा प्रभावी वापर होईल, याची दक्षता घेण्याचे निर्देशही मुख्य कार्यकारी अधिकारी नायर यांनी संबंधित अधिकाऱ्यांना दिले.
यावेळी एरंडोल येथील तालुका आरोग्य अधिकारी तसेच वैद्यकीय अधिकारी उपस्थित होते.
