महा पोलीस न्यूज । चेतन वाणी । अंगारकी चतुर्थीच्या पावन पर्वानिमित्त पद्मालय गणपती मंदिरात पहाटेच्या मंगल वातावरणात विशेष धार्मिक विधी पार पडले. जिल्हाधिकारी रोहन घुगे यांच्या हस्ते अभिषेक, विधिवत पूजा व आरती करण्यात आली. पहाटे सुमारे ४ वाजता सुरू झालेल्या या पूजेमुळे संपूर्ण मंदिर परिसर भक्तिरसात न्हाऊन निघाला होता.
पद्मालय हे गणपतीचे प्राचीन व जागृत स्थान म्हणून ओळखले जाते. येथे डाव्या व उजव्या सोंडेचे गणपती एकाच ठिकाणी विराजमान असल्यामुळे या मंदिराला विशेष महत्त्व आहे. अंगारकी चतुर्थी व संकष्टीच्या दिवशी येथे हजारो भाविक दर्शनासाठी येत असतात.
देवस्थान ट्रस्टच्या निमंत्रणावरून जिल्हाधिकारी रोहन घुगे यांनी विधिवत पूजा व आरती केली. त्यानंतर मंदिर भाविकांसाठी खुले करण्यात आले. यावेळी पुजारी गणेश वैद्य व केशवराव पुराणिक यांनी विधी पार पाडले.
पूजेनंतर जिल्हाधिकाऱ्यांनी मंदिराचा इतिहास व सुरू असलेल्या विकासकामांची माहिती घेतली. देवस्थान ट्रस्टतर्फे त्यांचा शाल व गणरायाची प्रतिमा देऊन सत्कार करण्यात आला.
या प्रसंगी विश्वस्त व मान्यवरांसह तहसीलदार, विविध क्षेत्रातील प्रतिनिधी उपस्थित होते. तसेच देवस्थानच्या वतीने भाविकांसाठी सावलीचे मंडप, कुलर व थंड पाण्याची व्यवस्था करण्यात आली होती.
अंगारकी चतुर्थी निमित्त पद्मालय येथे होणारा हा धार्मिक सोहळा भाविकांच्या श्रद्धेचा केंद्रबिंदू ठरला.
