भडगाव पोलीस ठाण्यात वादग्रस्त प्रकरण ; निरीक्षक पांडुरंग पवार यांना सेवेतून बडतर्फ करण्याची मागणी

भडगाव पोलीस ठाण्यात वादग्रस्त प्रकरण ; निरीक्षक पांडुरंग पवार यांना सेवेतून बडतर्फ करण्याची मागणी

भाजपा तालुकाध्यक्ष सोमनाथ पाटील यांची पोलीस अधीक्षक महेश्वर रेड्डी यांना लेखी तक्रार

भडगाव:प्रतिनिधी

भडगाव पोलीस ठाण्याच्या प्रभारी पोलीस निरीक्षक पांडुरंग पवार यांनी आपल्या पदाचा गैरवापर करून आर्थिक फायद्यासाठी बेकायदेशीर कृत्य केल्याचा गंभीर आरोप करण्यात आला आहे. याप्रकरणी त्यांना त्वरित सेवेतून बडतर्फ करण्याची मागणी भाजपा तालुकाध्यक्ष सोमनाथ पाटील यांनी पोलीस अधीक्षक महेश्वर रेड्डी यांच्याकडे लेखी तक्रारीद्वारे केली आहे.

बेकायदेशीर कार्यपद्धतीमुळे मुख्यमंत्र्यांची प्रतिमा मलीन
तक्रारीनुसार, भडगाव पोलीस ठाण्यात दाखल गुन्हा क्रमांक ७५/२०२५ व ७६/२०२५ संदर्भात गोरक्षकांनी ताब्यात दिलेले ११ गोवंश आणि वाहने पोलिसांनी निलमणी प्रतिष्ठान संचालित गोसंवर्धन केंद्रात संगोपनासाठी दिली होती. मात्र, पोलीस निरीक्षक पांडुरंग पवार यांनी न्यायालयाच्या अधिकार क्षेत्रात हस्तक्षेप करत स्वतःच्या आर्थिक फायद्यासाठी बेकायदेशीररित्या या गोवंशांची मालकी ठरवून ती आणि वाहने मूळ मालकांना परत करण्यासाठी बेकायदेशीर पत्रव्यवहार केला.

वर्दीचा दुरुपयोग करून दबाव आणि अरेरावी
पोलीस निरीक्षक पवार यांनी निलमणी प्रतिष्ठानच्या व्यवस्थापकांवर वर्दीचा दबाव टाकत अरेरावीच्या भाषेत गोवंश सोडण्यास भाग पाडले, असा आरोप तक्रारीत करण्यात आला आहे. या संपूर्ण घटनेचे व्हिडिओ फुटेज पुरावा म्हणून देण्यास आम्ही तयार आहोत, असेही तक्रारीत स्पष्ट करण्यात आले आहे.

पोलीस निरीक्षकांनी हे कृत्य लपवण्यासाठी एका सोशल मीडिया चॅनेलवर मुलाखत देऊन चुकीची माहिती दिली. त्यांनी भारतीय नागरी सुरक्षा संहिता २०२३ च्या कलम १०७ (३) आणि १०६ (३) चा चुकीचा उल्लेख करून गोवंश सोडण्याचे समर्थन केले. परंतु, या दोन्ही कलमांचा या प्रकरणाशी काहीही संबंध नाही, असे तक्रारीत नमूद आहे.

मुख्यमंत्र्यांच्या १०० दिवसीय कार्यक्रमाचा गैरवापर
मुख्यमंत्री एकनाथ शिंदे यांच्या १०० दिवसीय ७ कलमी कार्यक्रमाअंतर्गत गोवंश सोडण्याचे कोणतेही आदेश नसताना, पवार यांनी खोटे दावे करून प्रशासनाची दिशाभूल केली. त्यामुळे सामान्य नागरिकांमध्ये मुख्यमंत्र्यांची प्रतिमा मलीन करण्याचा कट रचल्याचा आरोपही करण्यात आला आहे.

अवैध कृत्य लपवण्यासाठी खोटा दस्तऐवज?
गुन्हा क्रमांक ७५/२०२५ आणि ७६/२०२५ मधील गोवंश जखमी अवस्थेत असताना कोणतेही वैद्यकीय प्रमाणपत्र न घेताच त्यांना सोडण्यात आले. तसेच, गुन्हा क्रमांक ७६/२०२५ मधील वाहनाचा चालक मद्यधुंद अवस्थेत असतानाही त्याच्या विरोधात योग्य ती कलमे लागू करण्यात आलेली नाहीत.

प्रभारी निरीक्षकांचा गुन्ह्यात प्रत्यक्ष सहभाग?
या संपूर्ण प्रकरणात पोलिस निरीक्षक पांडुरंग पवार आणि त्यांच्या सहकाऱ्यांचा प्रत्यक्ष व अप्रत्यक्ष सहभाग असल्याचे तक्रारीत नमूद आहे. त्यामुळे त्यांच्यावर गुन्हा दाखल करून त्यांना सहआरोपी म्हणून समाविष्ट करावे आणि सेवेतून कायमस्वरूपी बडतर्फ करावे, अशी मागणी भाजपा तालुकाध्यक्ष सोमनाथ पाटील यांनी केली आहे.

पुरावे आणि तक्रारपत्रात समाविष्ट केलेले दस्तऐवज
तक्रारीसोबत भडगाव पोलीस ठाण्याने निलमणी प्रतिष्ठानला दिलेल्या पत्रव्यवहाराच्या झेरॉक्स प्रती जोडण्यात आल्या आहेत. यावर भाजपा तालुकाध्यक्ष सोमनाथ पाटील यांची स्वाक्षरी आहे.

पुढील कारवाई काय?
या गंभीर आरोपांवर पोलीस अधीक्षक महेश्वर रेड्डी काय निर्णय घेतात, याकडे संपूर्ण जिल्ह्याचे लक्ष लागले आहे. प्रभारी निरीक्षक पवार यांच्यावर कारवाई केली जाणार की प्रकरण दडपले जाणार? हे पाहणे महत्त्वाचे ठरणार आहे.