१५ जूनपर्यंत मान्सूनची मंद वाटचाल; शेतकऱ्यांना पेरणीची घाई न करण्याचा सल्ला
कोकणात मान्सून दाखल, मात्र राज्यभर समाधानकारक पावसाची प्रतीक्षा; खानदेशात तापमान ४० अंशांच्या पार
मुंबई (प्रतिनिधी) : मान्सूनने दक्षिण कोकणात प्रवेश केला असला तरी राज्यभर त्याचा प्रभाव अद्याप पूर्णपणे सक्रिय झालेला नाही. हवामान विभागाच्या ताज्या अंदाजानुसार किमान १५ जूनपर्यंत राज्यातील बहुतांश भागांत मान्सूनच्या प्रगतीचा वेग मंद राहण्याची शक्यता असून सर्वदूर समाधानकारक पावसाची शक्यता कमी असल्याचे स्पष्ट झाले आहे.
सिंधुदुर्ग आणि रत्नागिरी जिल्ह्यांतील काही भागांमध्ये ९ जूनपर्यंत मध्यम ते जोरदार पावसाचा अंदाज व्यक्त करण्यात आला आहे. मात्र त्यानंतर पावसाचा जोर कमी होण्याची शक्यता असल्याने राज्यातील शेतकऱ्यांसमोर खरीप हंगामाच्या नियोजनाचे आव्हान उभे राहिले आहे.
खानदेश, विदर्भात उष्णतेचा तडाखा कायम
हवामान खात्याच्या अंदाजानुसार विदर्भ, मराठवाडा, खानदेश आणि मध्य महाराष्ट्रातील काही भागांत दुपारनंतर मेघगर्जनेसह वादळी पावसाच्या हलक्या ते मध्यम सरी कोसळू शकतात. मात्र हा पाऊस व्यापक स्वरूपाचा नसल्याने पेरणीसाठी आवश्यक वातावरण निर्माण होण्याची शक्यता कमी आहे.
दरम्यान, १२ जूनपर्यंत राज्यातील अनेक भागांत उष्णतेची लाट कायम राहण्याची शक्यता आहे. विदर्भ आणि खानदेशात कमाल तापमान ४० अंश सेल्सिअसच्या पुढे जाण्याचा अंदाज असून मराठवाड्यात तापमान ३५ ते ४० अंशांच्या दरम्यान राहू शकते.
कृषी विभागाचे आवाहन
कृषी व आपत्ती व्यवस्थापन विभागाने शेतकऱ्यांना आगामी वादळी पावसाच्या सरींवर विश्वास ठेवून पेरणीची घाई न करण्याचा सल्ला दिला आहे. पुरेशा आणि सातत्यपूर्ण पावसाची खात्री झाल्यानंतरच पेरणी करावी, असे आवाहन करण्यात आले आहे.
तसेच मेघगर्जना आणि विजांच्या कडकडाटाच्या काळात झाडाखाली, टिनशेडखाली किंवा विद्युत खांब, ट्रान्सफॉर्मर आणि वीजवाहिन्यांच्या परिसरात थांबणे टाळावे, असेही नागरिकांना सूचित करण्यात आले आहे.
शेतकऱ्यांसाठी सावधगिरीचा इशारा
मान्सूनचे आगमन झाले असले तरी पावसाचा वेग आणि विस्तार अद्याप मर्यादित असल्याने शेतकऱ्यांनी संयम बाळगून हवामानाचा नियमित आढावा घ्यावा. घाईगडबडीत केलेली पेरणी पावसाअभावी धोक्यात येऊ शकते, त्यामुळे नियोजनपूर्वक निर्णय घेणे आवश्यक असल्याचे कृषी तज्ज्ञांनी म्हटले आहे.
