महा पोलीस न्यूज । चेतन वाणी । महाराष्ट्रात दुष्काळाची परिस्थिती निर्माण झाल्याच्या पार्श्वभूमीवर संकटग्रस्त नागरिकांच्या मदतीसाठी जळगाव शहराचे आमदार सुरेश दामु भोळे (राजूमामा) यांनी सामाजिक बांधिलकी जपत मुख्यमंत्री सहायता निधीसाठी २ लाख रुपयांचा धनादेश सुपूर्द केला.
मुंबई येथे ६ ऑक्टोबर रोजी हा धनादेश मुख्यमंत्री महोदयांकडे सुपूर्द करण्यात आला. दुष्काळामुळे शेतकरी, शेतमजूर तसेच ग्रामीण भागातील अनेक कुटुंबांसमोर आर्थिक आणि सामाजिक अडचणी निर्माण झाल्या आहेत. अशा परिस्थितीत शासनाच्या मदतीसोबतच समाजातील सक्षम घटकांनीही पुढे येऊन योगदान देण्याची गरज असल्याचे आमदार भोळे यांनी सांगितले.
“दुष्काळ ही केवळ शासनाची जबाबदारी नाही”
आमदार राजूमामा भोळे म्हणाले, “दुष्काळ ही केवळ शासनाची जबाबदारी नसून अशा कठीण काळात समाजातील प्रत्येक सक्षम घटकाने आपली सामाजिक बांधिलकी जपणे गरजेचे आहे. आपल्या क्षमतेनुसार केलेली मदत एखाद्या गरजू कुटुंबासाठी मोठा आधार ठरू शकते.”
उद्योजक, व्यापारी आणि दानशूर नागरिकांना आवाहन
जळगावसह संपूर्ण महाराष्ट्रातील उद्योजक, व्यापारी, दानशूर नागरिक, सामाजिक व सेवाभावी संस्था तसेच विविध क्षेत्रातील सक्षम व्यक्तींनी मुख्यमंत्री सहायता निधीत आपल्या क्षमतेनुसार योगदान द्यावे, असे आवाहनही आमदार भोळे यांनी केले.
“आज आपण दिलेला मदतीचा हात उद्या एखाद्या कुटुंबाला संकटातून सावरण्याचे बळ देऊ शकतो. दुष्काळाच्या या कठीण काळात ‘मी समाजासाठी काय करू शकतो?’ या भावनेतून प्रत्येकाने पुढे येण्याची गरज आहे,” असे त्यांनी नमूद केले.
शासनाचा हात अन् समाजाची साथ
दुष्काळाच्या परिस्थितीवर मात करण्यासाठी शासनाकडून विविध उपाययोजना सुरू असताना समाजातील दानशूर आणि सक्षम घटकांनीही मदतीचा हात पुढे केल्यास मदतकार्य अधिक व्यापक होऊ शकते. संकटाच्या काळात शासनाचा हात आणि समाजाची साथ एकत्र आली, तर अनेक कुटुंबांना आधार मिळू शकतो, या भावनेतून आमदार राजूमामा भोळे यांनी मुख्यमंत्री सहायता निधीसाठी दोन लाख रुपयांचे योगदान दिले आहे.
