गणेशोत्सवाच्या पार्श्वभूमीवर जळगाव पोलिसांचा दणका; सराईत गुन्हेगारावर MPDAची कारवाई

महा पोलीस न्यूज । चेतन वाणी । आगामी गणेशोत्सवाच्या पार्श्वभूमीवर कायदा व सुव्यवस्था अबाधित ठेवण्यासाठी जळगाव पोलिसांनी सराईत गुन्हेगारांविरोधात कठोर कारवाईचा बडगा उगारला आहे. जळगाव शहर पोलीस ठाण्याच्या हद्दीत वारंवार गुन्हे करणाऱ्या तन्वीर ऊर्फ तन्न्या रहीम शेख (वय २१, रा. नुरानी मशीदजवळ, गेंदालाल मिल, जळगाव) याच्यावर महाराष्ट्र झोपडपट्टीदादा, हातभट्टीवाले, औषधीद्रव्य विषयक गुन्हेगार व धोकादायक व्यक्ती यांच्या विघातक कृत्यांना आळा घालण्याबाबतच्या कायद्यान्वये (MPDA) स्थानबद्धतेची कारवाई करण्यात आली आहे.

तन्वीर ऊर्फ तन्न्या शेख याच्याविरुद्ध जळगाव शहर पोलीस ठाण्यात विविध गंभीर स्वरूपाचे एकूण ११ गुन्हे दाखल असल्याचे पोलिसांनी स्पष्ट केले आहे. यामध्ये जबरी चोरी, सरकारी नोकरावर हल्ला, दुखापत, दंगलीसह घरफोडी, आगळीक आणि आर्म्स ॲक्टसंबंधी गुन्ह्यांचा समावेश आहे.

२०२२ पासून गुन्हेगारी कारवायांचा सिलसिला
पोलिसांच्या नोंदीनुसार आरोपीविरुद्ध जळगाव शहर पोलीस ठाण्यात २०२२ ते २०२६ या कालावधीत विविध गुन्हे दाखल आहेत. यामध्ये २०२२ मधील गुन्हा क्रमांक १५०/२०२२, २०२३ मधील ३२७/२०२३, २०२४ मधील २२७/२०२४ व २८४/२०२४, तसेच २०२५ आणि २०२६ मधील गुन्ह्यांचा समावेश आहे. २०२६ मध्येही त्याच्याविरुद्ध गुन्हे दाखल झाल्याची नोंद प्रेसनोटमध्ये आहे. याशिवाय त्याच्याविरुद्ध प्रतिबंधात्मक स्वरूपाची कारवाईही यापूर्वी करण्यात आली होती. २०२२ ते २०२६ दरम्यान दाखल असलेल्या आणखी १३ गुन्ह्यांची माहिती पोलिसांच्या नोंदीत देण्यात आली आहे. तसेच महाराष्ट्र पोलीस कायदा कलम १२९ अन्वये दोन प्रतिबंधात्मक कारवायांमध्ये अंतिम बॉण्ड घेण्यात आल्याचेही नमूद आहे.

प्रतिबंधात्मक कारवायांनंतरही गुन्हेगारी प्रवृत्ती कायम
पोलिसांच्या म्हणण्यानुसार, आरोपीच्या वर्तनात सुधारणा व्हावी यासाठी त्याच्याविरुद्ध वेळोवेळी प्रतिबंधात्मक कारवाई करण्यात आली होती. मात्र, त्यानंतरही त्याने पुन्हा गुन्हे करण्याची सवय सुरूच ठेवली. त्यामुळे आगामी गणेशोत्सवाच्या काळात त्याच्याकडून सार्वजनिक शांतता व कायदा-सुव्यवस्थेला धोका निर्माण होण्याची शक्यता लक्षात घेऊन MPDA अंतर्गत प्रस्ताव तयार करण्यात आला.

पोलीस निरीक्षक सागर शिंपी यांनी तयार केला प्रस्ताव
जळगाव शहर पोलीस ठाण्याचे पोलीस निरीक्षक सागर शिंपी यांनी तन्वीर ऊर्फ तन्न्या शेख याच्याविरुद्ध MPDA अंतर्गत स्थानबद्धतेचा प्रस्ताव तयार केला. हा प्रस्ताव ११ ऑगस्ट २०२६ रोजी स्थानिक गुन्हे शाखा, जळगाव येथे सादर करण्यात आला. त्यानंतर प्रस्तावाचे अवलोकन करून तो जिल्हाधिकारी, जळगाव यांच्याकडे सादर करण्यात आला. प्रस्तावाची दखल घेत जिल्हाधिकारी रोहन घुगे यांनी १४ ऑगस्ट रोजी आदेश क्रमांक दंडप्र/कावि/एमपीडीए/०४/२०२६ अन्वये आरोपीला येरवडा, जिल्हा पुणे येथील कारागृहात स्थानबद्ध करण्याचा आदेश पारित केला.

पोलिसांच्या पथकाने ताब्यात घेत येरवड्यात केले दाखल
जिल्हाधिकाऱ्यांच्या आदेशानंतर जळगाव शहर पोलीस ठाण्याचे पोलीस निरीक्षक सागर शिंपी, सपोनि सुरेश आव्हाड, मपोउनि श्रीमती सावित्री ढगे, पोहेकॉ/उमेश भांडारकर, सफौ/दिपक शिरसाठ, पोकॉ/सतीश पाटील, पोकॉ/अमोल ठाकूर, पोकॉ/प्रणय पवार, पोकॉ/राहुल पांचाळ, पोकॉ/दिपक पाटील आणि पोकॉ/दिनेश कंकर यांनी आरोपीला १४ ऑगस्ट रोजी ताब्यात घेतले. त्यानंतर त्याला येरवडा मध्यवर्ती कारागृहात दाखल करण्यात आले.

वरिष्ठ अधिकाऱ्यांच्या मार्गदर्शनाखाली कारवाई
ही MPDA कारवाई जळगावचे पोलीस अधीक्षक श्रीकांत धिवरे, अपर पोलीस अधीक्षक संदीप गावित आणि उपविभागीय पोलीस अधिकारी नितीन गणापुरे यांच्या मार्गदर्शनाखाली करण्यात आली. तसेच स्थानिक गुन्हे शाखा, जळगाव कर्मचारी सफौ/सुनील पंडित दामोदरे, सफौ/जयंत भानुदास चौधरी, पोहेकॉ/रफिक शेख कालू आणि पोहेकॉ/संदीप चव्हाण यांनीही या कारवाईत काम पाहिले.

आगामी गणेशोत्सवाच्या पार्श्वभूमीवर वारंवार गुन्हेगारी कारवायांमध्ये सहभागी असलेल्या व्यक्तींवर कठोर प्रतिबंधात्मक कारवाई करण्याचा पोलिसांचा निर्धार या कारवाईतून स्पष्ट झाला आहे. MPDA अंतर्गत झालेल्या या कारवाईमुळे जळगाव शहरातील गुन्हेगारी प्रवृत्तीच्या व्यक्तींना पोलिसांनी स्पष्ट इशारा दिला आहे.