नसरापूर चिमुकली अत्याचार-हत्या प्रकरण; आरोपी भीमराव कांबळेला फाशी
विशेष न्यायालयाचा ऐतिहासिक निकाल; राज्य हादरवणाऱ्या गुन्ह्याला मृत्युदंडाची शिक्षा
पुणे | प्रतिनिधी
पुणे जिल्ह्यातील नसरापूर येथे साडेतीन वर्षीय चिमुकलीवर लैंगिक अत्याचार करून तिची निर्घृण हत्या केल्याप्रकरणी विशेष न्यायालयाने आरोपी भीमराव कांबळे याला फाशीची शिक्षा सुनावली आहे. राज्यभर संतापाची लाट उसळलेल्या या बहुचर्चित प्रकरणात न्यायालयाने आरोपीला दोषी ठरवल्यानंतर शिक्षेचा निर्णय २९ जूनपर्यंत राखून ठेवला होता. सोमवारी विशेष न्यायालयाने हा गुन्हा अत्यंत क्रूर आणि दुर्मीळ स्वरूपाचा असल्याचे नमूद करत मृत्युदंडाची शिक्षा जाहीर केली.
तपासानुसार, १ मे २०२६ रोजी आरोपीने साडेतीन वर्षीय चिमुकलीला खाऊ देण्याचे आमिष दाखवून तिचे अपहरण केले. त्यानंतर तिच्यावर लैंगिक अत्याचार करून हत्या केली आणि पुरावे नष्ट करण्याच्या उद्देशाने मृतदेह शेणाच्या ढिगाऱ्यात लपवून ठेवला. या घटनेनंतर परिसरात एकच खळबळ उडाली होती.
तपासादरम्यान पोलिसांच्या हाती लागलेल्या सीसीटीव्ही फुटेजमध्ये आरोपी चिमुकलीचा हात धरून नेत असल्याचे स्पष्टपणे दिसून आले होते. या महत्त्वपूर्ण पुराव्यांच्या आधारे पोलिसांनी आरोपीला अटक केली. चौकशीदरम्यान आरोपीने गुन्ह्याची कबुली दिल्याची माहिती तपासातून समोर आली होती.
सुनावणीदरम्यान न्यायालयाने गुन्ह्याचे स्वरूप अत्यंत अमानुष, क्रूर आणि समाजमन हादरवणारे असल्याचे निरीक्षण नोंदवले. दोन्ही बाजूंचे युक्तिवाद, तपासातील भक्कम पुरावे तसेच सर्वोच्च न्यायालयाच्या विविध निर्णयांचा संदर्भ विचारात घेऊन हा निकाल देण्यात आल्याचे न्यायालयाने स्पष्ट केले.
शिक्षा सुनावली जात असताना न्यायालयात पीडित चिमुकलीचे आई-वडील उपस्थित होते. त्यांनी आरोपीला फाशीची शिक्षा देण्याची मागणी केली होती. विशेष म्हणजे आरोपीच्या कुटुंबीयांनीही त्याच्या कृत्याचा निषेध करत कठोर शिक्षेची मागणी केल्याची बाब या प्रकरणात विशेष ठरली. निकालाच्या पार्श्वभूमीवर न्यायालय परिसरात कडेकोट पोलीस बंदोबस्त तैनात करण्यात आला होता.
या भीषण घटनेनंतर राज्यभरातून संताप व्यक्त करण्यात आला होता. विविध सामाजिक संघटना, नागरिक आणि राजकीय नेत्यांनी पीडित कुटुंबीयांची भेट घेऊन आरोपीला कठोरातील कठोर शिक्षा देण्याची मागणी केली होती. अखेर विशेष न्यायालयाने आरोपीला मृत्युदंडाची शिक्षा सुनावल्याने या बहुचर्चित प्रकरणाला न्यायालयीन टप्प्यावर महत्त्वपूर्ण पूर्णविराम मिळाला आहे.
